Shillong, Jymmang 22:
Ka Meghalaya Biodiversity Board ha ka Lah Sngi U Blei ka la rakhe ïa ka International Day for Biological Diversity (IDBD) 2023 halor ka phang, “From Agreement to Action: Build Back Biodiversity” ha U Soso Tham Auditorium, Shillong.
U kongsan ha kane ka sngi u long u Chief Secretary ka Jylla, Bah D.P. Wahlang.
U kongsan lem bad ka Deputy Commissioner, East Khasi Hills District, Kong R.M. Kurbah, Commissioner & Secretary, Forest and Environment cum Chairman, Meghalaya Biodiversity Board, u S. M. A Razi, PCCF & HOFF, u R.S. Gill, nalor kiwei-kiwei ki la pyllait ïa ki ‘Poster’ halor ka jingdon-jingem mariang ba don jingim, ki kot lyngkdop halor ki ‘Biodiversity Heritage Site’ bad sam ruh ïa ki khusnam sha ki nongjop jong ka jingïakop kyntip bad ïakop shon dur ba la pynlong kum shi bynta jong ka jingrakhe.
Haba ai jingkren ha ka jingïalang, u Chief Secretary ka Jylla, Bah Wahlang u la ong ba ka phang mynta u snem ka kdew ïa ki briew ba ki dei ban leh eiei ban tei biang ïa ki jingdon-jingem mariang. U la ban jur ba ka dei ka jingkitkhlieh jong baroh ki briew ban ïada ïa ki jingdon-jngem mariang.
Haba kdew ïa ka jingdonkam ka jingnang-jingtip jong ki paidbah halor kane ka mat, u Bah Wahlang u la ong ba ka United Nation ka la rai ban rakhe ïa kane ka sngi ban pynsaphriang jingtip bad ruh ban pynrung ha ka jingmut haba ïadei bad ka jingdonkam ki jingdon-jingem mariang khamtam ha ki pateng ban dang wan.
U la ong ruh ba ka long kaba donkam ïa baroh ki Biodiversity Management Committee (BMC) jong ka Jylla ha ki shnong ki thaw ban pynsaphriang ïa ka jingtip ban ïada ïa ka mariang, ki syntiew ki skud, ki mrad bad ki mreng jong ka thaiñ da ka jingïarap jong ka People’s Biodiversity Register (PBR).
Ha kane ka sngi, u kongsan u la aiti ruh ïa ka khusnam ‘Best Biodiversity Management Committee’ (BMC), 2023 sha ka Umtngam BMC hapoh Bhoirymbong C&RD Block, Ri-Bhoi District bad ka khusnam ‘State Level Best Biodiversity Conservation’ sha u Bah Tyngshaiñlang Dewkhaid na Phlangwanbroi, Mawsynram, East Khasi Hills.
