Shillong, Jymmang 22:
U Babu Kular Khongjirem uba dei u nonghikai ba la rangbah tam bad uba la hikai kumba 37 snem hapoh ka skul Khasi Jaiñtia Presbyterian Girls HSS haba kren halor ka jingjia pluh jong katei ka skul kaba la jia ha ka step phyrngab jong ka Sngi U Blei ka 21 tarik u Jymmang 2023, u ong ba na ka liang ki nonghikai, ki khynnah skul bad ki kmie ki kpa ki dap da ka jingsngewsih kaba khraw bha hadien kane ka jingduh ïa kane ka jaka pule kaba la rim.
U Babu Kular u la pynpaw ba kum ka skul baroh kawei ki pynpaw ka jingsngewsih haba kane ka skul kaba ki la hikai naduh mynstep haduh janmiet kaba la long kum ka ïing lajong ka la shu pluh bad ing kynsan khlem poi pyrkhat.
“Na ka liang jong ngi ki nonghikai, ki khynnah skul bad ki kmie ki kpa, ngi pynpaw ka jingsngewsih bad ka jingkthang mynsiem bad ka jingduh kaba khraw ym tang na ka bynta ka skul hynrei na ka bynta ka lawei jong ki khynnah jong kane ka skul ka jong ngi”, la ong u Babu.
Utei u Babu u la ïathuh ba katei ka ding ka la bam naduh ki kamra klas 6 haduh klas 10 kaba don lai tylli ki Section man kawei-pa-kawei ka klas.
Nangta u la ïathuh ruh ba ha kaba ïadei bad ki khynnah kiba shong hostel ha katei ka jaka pule kiba bun na ki kmie ki kpa ki la wan shaw noh ïa la ki khun ban ïalam sha shnong.
“Ngin nym ailad ïa ki khynnah ba kin duh palat ïa ka jingpule khamtam ba ka la jan dei ka por eksam bad khamtam ban ïaleh ban pyndep kham kloi ïa ki lynnong kot bad ngin pyrshang katba lah kum ki nonghikai ba ngin shimkhia ïa ka jinghikai jong ki khynnah”, la ong u Babu.
U Babu Kular u la pynbna ruh ba ïa mynta ki nonghikai kin sa dang shong ban ïa pyrkhat shwa kumno ban leh ha kaba ïadei bad ki khynnah skul. Ïa mynta shipor ki khynnah skul bad ki khynnah kiba sah ha hostel kin shong shwa ha ïing bad ki nonghikai kin shim khia ïa ki khynnah bad hadien shitaïew kin sa sdang biang ban shim ïa ki klas.
Kumta na ka liang utei u Babu u la kyrpad ruh ïa ki kmie ki kpa jong ki khynnah skul ba kin ïai shah lem bad ki nonghikai bad kin ïaleh katba lah ban pynlong kloi ïa ka skul khnang ba ki khynnah skul kin nym duh ïa ka jinghikai.
Na ka liang jong ki nonghikai ki la kyrpad ruh ïa ki khynnah skul ba kin tista ban khreh kot namar ïa ka eksamin shiteng snem kin pynlong beit kumba la pynbeit ban pynlong.
