New Delhi, Jymmang 22:
Ka National People’s Party (NPP) ka la rai ban ïakren bad baroh ki jaidbynriew ba kin ïatreilang na ka bynta ban lah wanrah pat ïa ka shong suk shong shngaiñ ha Jylla Manipur kaba don hapdeng ka jingshong syier hadien ka jingïakynad sngewpher jaidbynriew dang shen.
Haba ïakren bad ki nongthoh khubor hadien ba pynïaid ïa ka jingïalang jong ka National Committee jong ka NPP ba long ha Constitution Club of India, New Delhi hynne ka Lah Sngi U Blei, u National President bad Myntri Rangbah ka Jylla Conrad K Sangma u la ong “Ka NPP ka pang mynsiem halor ka jinglong jingman ha Jylla Manipur. Kum ka seng, ngi rai ban ïakren bad baroh ki jaidbynriew ba kin ïatreilang ha ka ban lah wanrah pat ïa ka shong suk shong shngaiñ. Ngi duwai ka jingjai jai kan wan phai noh kham kloi ka ban long na ka bynta ka Jylla bad ki nongshong shnong”.
U la ong ba ka seng ka la rai ban leh kat kaba lah ban lah wan rah pat ïa ka jingsuk ha Manipur.
“Ngi la shim rai ba kum ka seng saiñ pyrthei, ban leh kat kaba lah na ka liang jong ngi ha ka ban ïarap bad pyntikna ba ka jingsuk kan wan phai biang bad ruh ban ïarap ïa ki briew ha baroh ki jingeh ba ki ïakynduh. Ki nongïalam bad ki nongtrei ka seng ki la ïatrei khlem shongthait ban pyntikna ba ngin lah ban ïarap bad kyrshan ïa ki briew na Manipur ha kane ka khep ba jynjar” u la ong.
Ha kane ka jingïalang jong ka National Committee ka NPP la wan ban ïashim bynta da ki nongkitkam na ka jylla Assam, Arunachal Pradesh, Manipur, Mizoram, Chhattisgarh, Jharkhand, Karnataka, Gujarat bad Uttar Pradesh.
Ha kane ka jingïalang, ki nongïalam na ki jylla bapher bapher ki la ai kaiphod halor ka jingpynkhreh jong ki ïa ka ilekshon MP Lok Sabha ban wan bad kumjuh ruh ïa ka ilekshon MLA ka ban sa long ha Mizoram. Nalor kane, la pynkup burom ruh ïa ki MLA ba thymmai ka Meghalaya, Nagaland bad Manipur.
U National Treasurer, James K Sangma u la ai kaiphod halor ka mang tyngka ka seng ba shisien shisnem jong u 2023-2023, kaba long kat kum ka Article 23 (V) jong ka riti treikam ka seng. U la ai kaiphod ruh halor ka audited statement jong ka pla tyngka ba shisien shisnem. Kumjuh ruh ki President jong ki jylla bapher bapher ki la ai ïa ka kaiphod treikam ha la ki jong ki jylla.
Lah ban kdew hangne, ka NPP ka dei kawei na ki 6 tylli ki National Party hapoh ka Jylla, bad tang ma ka kaba dei kaba mih na ka thaiñ Shatei Lam Mihngi ka Ri.
Ha kajuh ka por, u Conrad u la pynbna ruh ïa ka jingpynkiew kyrdan ïa u National Treasurer James K Sangma kum u National General Secretary (Organisation) ba khmih ïa ka Jylla Arunachal Pradesh. Namar ka ilekshon ban wan ha Mizoram, ka NPP ka la thung ïa ka Myntri Sorkar Kong Ampareen Lyngdoh kum ka nongïalam ba khmih ïa ka Mizoram.
U MLA na Manipur M Rameshwar Singh bad MLA na Meghalaya Ian Botham K Sangma lem bad u nongïalam ka seng u Sushil Huidrom ki la shah thung kum ki co-in-charge ka Arunachal Pradesh bad Mizoram ban khmih ïa ki kam ka seng ha kine ki jylla na ka bynta ka ilekshon MP Lok Sabha bad ilekshon MLA.
Ïa u MLA ka Nagaland N Nyamnyei Konyak la thung kum u President ka NPP ha Nagaland, katba ïa u President Dr Andrew Ahoto la kyntiew kyrdan kum u National General Secretary.
