Nongpoh, Jymmang 22:
Ha kawei ka jingjia tyngkhuh kali kaba shyrkhei ha u surokbah National Highway-6 ha Ri-Bhoi District mynta ka janmiet, uwei u rangbah uba ñiah ïa ka ‘Scooty’ kaba don ïa u nombor ML-10-C-8114 u la khlad noh hashen hadien ka jingshah ïuh ha kawei ka trok kaba don ïa u nombor NL-01-G-6708 Katkum ka jingïoh lum khubor, la ïathuh ba kane ka la jia ha ki bynta jong ka shnong Umran Dairy ha ka por kumba 6 duna eiei mynta ka janmiet katba katei ka ‘Scooty’ bad katei ka trok ki dang hiar sha ki bynta ka thaiñ Nongpoh.
La ïoh jingtip ruh ba utei u nongñiah jong katei ka trok u la leit ban aiti hi ïalade sha ki bor pulit ka thanat Umsning bad ka jingtohkit ban lap ïa ka daw jong katei ka jingjia tyngkhuh kali ka dang ïaid shakhmat.
