Hiroshima, Jymmang:
U President ka United States, u Joe Biden ha ka Sngi U Blei u la wer bad khot sngewbha ia ki nongialam jong ka Japan bad ka South Korea ba kin leit ban iakren ha ka jingialang jong kitei lai tylli ri hapoh Washington ha ki khyndiat por ban wan.
Kitei ki nongialam ki la ioh ban iakynduh markhmat hapdeng ka jing-ialang G7 kaba la pynlong da ka Japan.
Namar la ong ba ka Japan bad ka South Korea, baroh ar tylli hi ki long ki ri ba iajan bad kiba ju iateh lok bad ka United States, hynrei ki la don pat ki kynrum-kynram bad ki jingeh kiba la pynthud ia ka jingiadei jong kitei ki ri bad ka US ha kine ki sngi. Kitei ki jingthud ki long naduh ka por ba la Japan ka dang leh bor ia ki kynthei bad ki paidbah ka Korea.
Hynrei u President ka South Korea, u Yoon Suk Yeol bad u Myntri Rangbahduh ka Japan u Fumio Kishida, ki la ialeh shitom ban wanrah ia ka shongsuk- shongsaiñ bad kumjuh ruh ban ai jingiarap sha kito ki longiing kiba la shah ktah bad iaid lyngba ia kitei ki jingshah leh bor ha ki por ba la leit.
Kumta ruh u Biden u la ïaroh ia katei ka jingtrei shitom jong kitei ki arliang ri naka bynta ban wanrah ia ka shongsuk- shongsaiñ bad kumjuh ruh ban nang pynskhem ia ka jingiadei hapdeng kitei ki 2 ri ha kine ki sngi ban wan.
Ha kajuh ka por ruh la ong ba kitei ki 3 ngut ki nongialam, ki la iakren halor kumno ban tehlakam ia ka jingleh bym suitñiew jong ka North Korea haba iadei bad ka jingmaham na ka South Korea bad ka US ban pynsangeh noh ia ki kam pynher ‘namding nuclear jongka, kaba ju jia khah khah na ka por sha ka por.
Ki heh ki la ong ruh ba katei ka jingialang hapdeng kitei ki 3 tylli ki ri ka lah ban long shen hynrei ym pat lah ban batai bniah ha kane ka por tad haduh ban da ioh ban ia pynbeit bad pynkhreh janai shwa.
Ha ki khyndiat por ba la leit, u Yoon bad Kishida ki la leit ban jurip sha ka jaka pynsah nam ha kaba la pyniap ia ki nong Korea ha ka por ka thma ha Hiroshima.
Ka long ruh ka sien kaba nyngkong eh ia kitei ki nongialam jong kitei ki 2 ri ba kin leit ban jurip lang ia katei ka jaka pynsah nam bad ka long ruh ka sien kaba 2 ia u Myntri Rangbahduh ka Japan ba un leh kumtei.
Namar kata, u Yoon u la ong ba kane ka long ka jingprat lynti kaba thymmai da ka jingshlur jong u Myntri Rangbahduh ka Japan naka bynta ban wanrah ia ka shongsuk- shongsaiñ bad ka jingiatrei lang hapdeng baroh arliang ri ha ki sngi ki ban wan.
