Rome, Jymmang:
Ka long ka trophy jingjop WTA 1000 kaba ar na bynta ka Elena Rybakina ban ioh khur mynta snem naba katei ka nongialehkai ka lah rah ia ka nam kum ka lahduh na ka lympung ialehkai Italian Open. Kane ka wan urlong hadien ba ka Anhelina Kalinina ka lah shongthait noh ha ka por ba dang iaid ka ‘set’ iakhun kaba ar ha ka lympung.
Kumta ha kaba iadei bad katei ka jinglah khur jngjop ka jong ka na ka lympung, ka khubor ba lah ioh lum ka iathuh ba ka Rybakina ka lah khur noh shalade ia ki 6-4, 1-0 jingjop hadien ka jingshongthait noh katei ka nongiakhun pyrshah na ka daw jong ka jingmynsaw kynsan ka kjat. Kum ban shu pynkynmaw hangne ka long ba ka Rybakina ka lah dep ban mad ruh ia ka jingshah pynrem ha ka Kalinina tang ha ki katto katne ki jingiakhun ba lah dep ha ka jingiakynduh ka jong ki kata ha Charleston ha u snem ba lah dep. Kumta hadien ka jingkhur ia ka jingjop ba san ha Rome ha ka kam iakhun paramarwei ka jong ka, katei ka nongialehkai kaba dang ia bat kum ka lahduh Wimbledon, ka lah nang iai pynksan shuh shuh ialade na ka bynta ban kiew mynta sha ka kyrdan ba 4 ha ka pyrthei hadien ar taiew ka ban pynlong ia ka ban paw ka kyrteng ha ka thup ba 5 ha ka thup kyrdan jong ka jingiakhun paramarwei ka WTA Tour.
Ha une u snem ba mynta ruh kumjuh, ka Rybakina ka long ka nongialehkai ba nyngkong ban lah khur haduh ar tylli ki trophy ka WTA 1000 jong ka aiom ialehkai ba mynta da kaba bynrap shuh shuh mynta da ka trophy ba ka lah khur ha Rome nalor ka trophy ba ka lah dep ban khur ha ka Indian Wells. Ka long ruh ka nongialehkai kaba lah kynjoh sha ka sien kaba lai jong ka jingiakhun phainal ha ka WTA 1000 mynta u snem ha Miami. Ha une u snem ba mynta, ka Rybakina ka lah khur ia ki 28 tylli ki jingjop ha ki tour -level match, da kaba iaisah ha ka kyrdan ba-ar ryngkat ba ka lahduh ha ka pyrthei ka Iga Swiatek.
