Shillong, Jymmang 22:
Ka Hynñiewtrep Integrated Territorial Organization (HITO) ha ka Lah Sngi U Blei ka la ong ba ka bhah kam (Job Reservation Policy) kaba la pynmih da ka ‘Government Resolution’ ha ka 12 tarik Kyllalyngkot, 1972, ka kdew shai ba ka jingai bhah ka long katkum ka jingbun briew (population).
Ha u kyrwoh khubor, u President ka HITO, u Bah Donbok Dkhar, u la ong ba lyngba katei ka ‘Government Resolution’, la bhah 40% na ka bynta ki Khasi Jaiñtia, 40% na ka bynta ki Garo, 5% na ka bynta kiwei pat ki riewlum bad ki Scheduled Caste ha Meghalaya.
“Ka bhah kam katkum ka ‘Resolution’ jong ka 12 tarik Kyllalyngkot, 1972, ka la kdew shai ba ka jingai bhah ka long katkum ka jingbun briew. Hynrei, kumba ka long mynta, ka paw ba kane ka bhah kam, kam ïahap satia bad ka jingdon briew ki Khasi, Jaiñtia bad Garo namar ha kato ka por, ki nongthaw aiñ ki la shu antad khlem da peit ïa ka khanasamari,” la ong u Bah Donbok.
Shuh shuh u la ong ba katkum ka khanasamari jong u snem 2011, ka jingdon paid jong ki Khasi Jaiñtia ka long kumba 14,11,775 ngut, katba ka jingdon paid ki Garo ka long kumba 8,21,026 ha Meghalaya. Katkum ka khanasamari jong u snem 2011, ka jingdon briew ha Meghalaya ka long 29 lak tam.
“Kane ka khanasamari ka pyni ba kiba kham bun ki dei ki Khasi Jaiñtia, hynrei ki dkhot jong kine ki jaitbynriew pat kim da ïoh than ïa ka bhah katkum ka Reservation Policy kaba treikam. Ka hok jong ki Khasi Jaiñtia ka la shah knieh lut, bad namarkata, ki samla Khasi Jaiñtia ki hap bad mad ïa ki jingeh ha ka jylla watla kam dei ka jingbakla jong ki,” u la ong.
Nalorkata, u la ong ba ka jingpyntreikam ïa ka Roster System la leh khlem da khmih bha ïa ka rukom bun paid bad khlem da peit bha ïa ki jingmyntoi bad ki jingduh jingmyntoi.
Haba kynthoh ïa ka khubor ba la pyllait da ka Achik Conscious Holistically Integrated Krima (ACHIK), Tura, ha kaba la ong ba kino kino kiba don jingthut ha kaba ïadei bad ka Reservation Policy ki lah ban leit sha ïingbishar Supreme Court, ka HITO ka long ba kane ka jingkynthoh ka long kaba pynkyndit namar ha ka jingshisha, dei ban leit shwa sha Meghalaya High Court, bad lada ym hun ïa ka rai jong ka, lah ban leit sa sha Supreme Court.
“Ka paw ba katei ka jingkynthoh ka long ka bym don nongrim bad khlem da peit ïa ki jingshisha bad ka jingthmu ka long beit ban wanrah ïa ka jingïakynad, bad ha kajuh ka por ban pynthohbria ïa ki katto katne ki nongïalam saiñpyrthei kiba ïakhun ban pynkylla ïa ka Reservation Policy,” u la ong.
Kumta na ka liang ka HITO ka la ban biang ba donkam ban pynbeit thymmai ïa ka Reservation Policy khnang ba ki Khasi Jaiñtia kin kham ïoh jaka ha ki kam sorkar katkum ka jingbun paid jong ki.
