Nongstoiñ, Jymmang 22:
Ka Seng Khasi West Khasi Hills District ha ka Lah Sngi U Blei ka la ïoh ban pynkut noh ïa ka ‘Shad Suk Mynsiem’ kaba 22 jong ka da ka jing-i-phuh i-phieng bad ka jingshongkun ha ryngkat ka jingwan ïashim bynta ki 4 tylli ki distrik ba kynthup ïa ka West Khasi Hills, South West Khasi Hills, Eastern West Khasi Hills bad East Khasi Hills.
Ha katei ka sngi la ïohi ïa ka jingïashim bynta shit rhem jong ki ’rang bad ki ’thei ha ka lympung shad bad kumba 138 ngut ki shynrang bad 120 ngut ki kynthei na kylleng ki jaka ki la poi lang ban pyni ïa ka jingshad tynrai ha la ka riam tynrai kaba dei ruh ka dustur jong ki Khasi, ha kajuh ka por kaba long ka dak jong ka jingsngewnguh ïa u Blei Trai Kynrad Nongbuh Nongthaw.
Ym tang katta, ha kane ka lympung shad la wan ban sakhi lang ruh da kiba bun ki paidbah na kylleng ki jaka.
Katei ka lympung ba shisien shisnem jong ka Seng Khasi West Khasi Hills ka la sdang naduh hynnin ka sngi ha Madan New Nongstoiñ, ha kaba ki tymmen ki san jong ka Seng Khasi Seng Kmie, Mawkhar, Shillong, ki la pyndep ïa ka ai-nguh ai-dem shuwa ba ki nongshad kin noh kjat ha ka lympung ha ka Lah Sngi U Blei bad ka ai-nguh ai-dem ka long ba U Blei Nongbuh Nongpynlong un ri un sumar bad un don ryngkat ha kane ka lympung bad ba kito baroh kiba la wan ban shim bynta ha ka jingshad, kin poi suk bad leit phai suk sha ki jaka ba ki wan.
Ha katei ka sngi hadien ba ka jingshad ka la kut, na ka liang u President ka Seng Khasi West Khasi Hills, Bah P. Ryntathiang u la ai ïa ka kyntien khublei sha baroh kiba la shim bynta bad pyndep ïa ka jingshad. La pynhap ruh ïa ka lama jong ka Seng Khasi da ki nongïalam Seng Khasi kiba la ai ruh ïa ki kyntien jinghikai jingsneng halor ka rukom riam shad bad kiwei-kiwei ki jingsneng jingkraw.
Nalor u Bah Ryntathiang la donlang ruh u P. Syiem, dkhot ka Seng Khasi Kmie na Mawkhar, Shillong, Secretary ka Seng Khasi West Khasi Hills, Bah M. Nongrum, ki tymmen ki san, ki longkmie longkpa, ki khun samla bad kiwei-kiwei.
