Shillong, Jymmang 22:
Ka Secretariat kaba dei ka shlem treikam kaba ju shong ki heh ki haiñ naduh ki Myntri Sorkar bad ki MLA kiba don sha ka Liang Synshar ka la kynjah ha ka Lah Sngi U Blei namar bun na ki Myntri bad MLA kim shym la don ha Jylla.
Ka jingkynjah ka Secretariat ha ki bynta ba shong ki Myntri Sorkar bad ki MLA ka dei namar ba kiba bun ki MLA ka NPP ki leit ïashim bynta sha ka National Committee Meeting ka NPP ha nongbah Delhi. Katba kiwei pat ki MLA ki leit sha ka Workshop kaba la pynlong khnang na ka bynta ki MLA ka Jylla ha Mohali, Punjab.
U Myntri Rangbah bad kiwei ki Myntri, lem bad kiwei ki MLA ka NPP na Meghalaya bad kiwei ki Jylla ki leit sha ka jingïalang ka NPP kaba la pynlong ha Delhi.
Ïa ka Workshop na ka bynta ki MLA ka Jylla la pynlong da ka Meghalaya Institute of Governance (MIG) ha ryngkat bad ka Indian School of Business (ISB), Mohali.
Kane ka workshop ki MLA ka dei naduh ka 22 tarik haduh ka 26 tarik mynta u Jymmang.
