Shillong, Jymmang 22:
Ka Synjuk Ki Nongsynshar Shnong Ka Bri U Hynñiewtrep (SNSBH) ha ka Lah Sngi U Blei ka la thaw ïa ka Core Committee ban ïakren sani bha halor ka mat ba ïadei bad ka ‘Roster System’.
Haba kren sha ki lad pathai khubor, u General Secretary ka SNSBH, Bah R.L. Blah u la ong ba ka komiti ba kynthup ïa 11 ngut ki dkhot ka la ïakynduh ha ka Sngi Balang ban ïakren halor ki mat kaba kin sa pynsngew lada don ka jingshah khot na ka Sorkar ban ïakren halor katei ka bynta.
U la ong ruh ba kum ka synjuk kam lah ban shu leit ïashim bynta rwing ha ka jingïalang namar ka synjuk kam da tip bha halor ka ‘Roster System’ naba bun na ki dkhot kim dei ki nongtrei Sorkar.
Katkum ka jingong jong u, ki donkam ban pynsawa ïa kawei ka sur haba ki leit ïashim bynta sha ka jingïalang.
U Bah Blah u la ong ba ka Sorkar ka la kular ban khot ïakren ïa ki halor katei ka mat bad ka jingïalang ka lah ban long ha ka 26 tarik mynta u bnai.
“Lada ka wan ne kam wan ka jingkhot, na ka liang ka synjuk ngin leit hi ban ïakynduh ïa ka Sorkar,” u la ong.
U la ong ruh ba ka Sorkar Jylla kan sa batai bniah lyngba ka ‘presentation’ halor ka jingthmu jong ka haba ïadei bad ka jingpyntreikam ïa ka ‘Roster System’.
Utei u nongïalam ka SNSBH u la ong ruh ba ka synjuk kam kwah ban kren eiei katba kam pat ïohsngew aïu ka Sorkar ka don ban ong.
Ha kawei ka liang, u General Secretary u la pynkynmaw ba u Myntri Rangbah ka Jylla, u Conrad K. Sangma u la kdew shai ba ka jingïakren kan dei beit thik tang halor ka ‘Roster System’.
U la ong ruh ba ka synjuk kan ym kren eiei tat ynda ki la ïoh shuwa ïa ka jingbatai bniah lyngba ka ‘presentation’.
“Hooid, ngi lah ban rai halor ka nongrim jong ngi tang hadien ka jingïalang bad ka Sorkar,” la ong u Bah Blah.
Shuh shuh u Bah Blah u la bynrap ba ka synjuk ka sngew ïahap ba dei ban pyntreikam nangne shakhmat ïa ka ‘Roster System’.
“Na ka liang u Myntri Rangbah, u Conrad K. Sangma bad ka Myntri ka tnad aiñ, Dr. M. Ampareen Lyngdoh ruh ki la kam ba yn pyntreikam nangne shakhmat ïa ka ‘Roster System,” u la ong.
