Shillong, Jymmang 22:
U President ba rangbah ka Voice of the People Party (VPP), Bah Ardent Miller Basaïawmoit u la ong ba ka jingïakhih shah thngan ka ban long ha ka Sngi Ba-ar kan ïaid beit shakhmat kumba la rai.
U Bah Basaïawmoit u la pynbna paidbah ba un shong shah thngan marwei (khlem buh por) hakhmat Secretariat naduh ka 23 tarik mynta u bnai.
Ka jingshim rai jong utei u nongïalam ka VPP ka long hadien ba ka seng kam sngewhun ïa ka jingïakren ha ka jingïalang ba la pynlong da ka Sorkar Meghalaya Democratic Party (MDA-2.0) ban ïakren halor ka ‘Roster System’ kaba la long ha ka 19 tarik mynta u bnai ha Secretariat naba ka Sorkar kam shym la kren eiei halor ka ‘Reservation Policy’.
Kane ha kawei ka liang ka la pynlong ïa ki nongïalam ka VPP ban mih jyndat na katei ka jingïalang.
“Hooid, ka jingshah thngan kan ïaid beit hakhmat Secretariat,” la ong u Bah Basaïawmoit ha ka Lah Sngi U Blei.
Haba kylli la ka Sorkar ka la kynjoh ktien ne em ïa u, utei u nongïalam u la ong ba kam pat don eiei kaba kum kata.
Kham ha shuwa, ka VPP ha ka 12 tarik mynta u bnai ka la ai por 48 kynta ïa ka Sorkar ban pynmih ïa ka jingpynbna ban pynsangeh ïa baroh ki jingthung kam kat bym pat lah pynbeit ïa ka ‘Reservation Policy’ bad ka ‘Roster System’.
Hadien kane, ka seng ha ka 17 tarik mynta u bnai ka la pynlong da ka jingshong kyllaiñ mungor ha jaka pynïeng kali hajan Additional Secretariat kum ka dak ban pyrshah ïa ka jingkuman ka Sorkar MDA 2.0 hapoh ka jingïalam ka NPP halor ka jingdawa ban pynsangeh ïa baroh ki jingthung kam hapoh ka Jylla kat bym pat khmih bniah ïa ka ‘Reservation Policy’ bad ka ‘Roster System’.
