Agartala, Jymmang:
Ki bor pulit jong ka jylla Tripura ki la pyntip ba ha ka jingleit khynra kiba la leit ban pynlong ha ka miet jong ka Sngi Thohdieng ba la dep ki la ïoh ban kem ïa haduh 5 ngut ki nong Bangladesh kiba la wan ban rung beaiñ sha u pud u sam jong ka ri India khlem da don ïa kino kino ki kot ki sla ba donkam. Ïa ka jingleit khynra ha katei ka miet ki bor pulit jong ka jylla ki la leit ban pynlong ha ka thaiñ Belonia, South Tripura district ha ka ïing sah jong uwei u briew u ba la tip kyrteng kum u Tamal Mallik.
Na ka liang ki bor pulit ka jylla ki la pyntip ruh ba u Mallik u dei uwei na ki runar u ba ju donkti ha ki kam khaïi mar beaiñ ha katei ka thaiñ.
Kat kum ka jingpyllait kyrwoh jong ka tnat pulit, la pyntip ba ïa ka jingleit khynra la pynlong hadien ka jingïoh jingtip ba u Mallik lem bad ki paralok jong u ki la pyrshang ban khaïi beaiñ ïa ki mar (jaiñ bad umphniang) sha shilliang pud jong ka ri Bangladesh. Ki bor pulit ki la pyntip ruh ba ïa baroh 5 ngut ki nong Bangladesh la ïoh ban kem na ka ïing sah jong u Mallik kaba don ha ka thaiñ khappud ba markhap bad ka ri Bangladesh. Kat kum ka jingïathuh jong u SDPO Belonia Abhijit Das u la pyntip ba ki 5 ngut ki nong Bangladesh kiba la shah kem ha katei ka miet ki kynthup ïa u MD Sajib (22 snem ka rta), Sahabuddin (25), Azad Hossin (22), Abdul Awual (17) bad u Jahidul Islam (16). Ïa kitei ki 5 ngut la leit ban rah tian bishar hakhmat ka ïing kashari bad na ka liang ka ïing kashari ka la pynmih da ka rai ba dei ban set hapoh ‘judicial custody’ ïa kitei ki 5 ngut tad haduh ka 2 tarik u jylliew.
