Agartala, Jymmang:
Ki bor sorkar jong ka jylla Tripura ha ka 21 tarik mynta u bnai ki la pyntip ba haduh 3 ngut ki khynnah rit ki la duh ei ïa la ki jong ki jingim hadien ba ki la ngam jyllop ha ka wah Khowai ha ka por kumba 11:00 baje mynstep.
Ki 3 ngut ki khynnah rit kiba la duh ei ïa la ki jong ki jingim ha katei ka sngi ki kynthup ïa i Saptadip Nama (7 snem ka rta) bad i Moutusi Das (12 snem ka rta). Kat kum ki jingïoh lum jingtip la ïathuh ba ha katei ka sngi, u paieit jong kitei ki 2 ngut ki khynnah rit u ba la tip kyrteng kum u Gopal Nama Das u la leit sum sha katei ka wah ha ryngkat kitei ki 2 ngut ki khynnah rit. Kumjuh la don ruh sa 2 ngut kiwei pat ki khynnah rit (Babli Roy – 11 bad Ayan Das – 6) kiba la leit lang bad ki. Na katei ka jingleit kai sha wah, la ïathuh ba 3 napdeng kitei ki 4 ngut ki khynnah rit ki la ngam jyllop ha katei ka wah.
Kat kum ka jingïathuh jong u Officer-in-Charge – Rajkumar Jamatia na Khowai Police Station u la pyntip na katei ka jingjia, la ïoh ban sei noh ïa 2 tylli ki metïap (Saptadip bad Babli Roy); bad ha ka sngi kaba bud la ïoh ban sei sa ïa ka metïap jong i Moutusi. Hadien katei ka jingjia, la ïathuh ba ïa ki metïap jong kitei ki 3 ngut ki khynnah rit la leit ban rah noh sha Khowai District Hospital na ka bynta ki kam kiba sah.
Hadien ka jingïoh ïa ka jingtip shaphang katei ka jingjia, na ka liang u Myntri Rangbah jong ka jylla – Dr. Manik Saha u la pynpaw ïa ka jingsngsewsih kaba khraw bad phah ruh ïa ka khubor sngewlem sha ki bahaïing hasem jong kitei ki khynnah rit.
Na ka liang u Myntri Rangbah u la kyrpad bad kyntu ruh ïa ki nongshong shnong jong ka jylla ba ki dei ban long kiba adkar haba ki leit kai sha lum sha wah khnang ban lah kiar na kino kino ki jingjia kiba sngewsih kiba lah ban jia ha kano kano ka por.
