Shillong, Jymmang 22:
Hadien ka jingjia pluh jong ka skul Khasi Jaiñtia Presbyterian Girls Higher Secondary School kaba don ha Mission Compound, Mawkhar kaba la jia ha ka step phyrngab jong ka Sngi U Blei ka 21 tarik u Jymmang 2023, ka la pynkyndit bad pynsngewsih ïa kiba bun balang khamtam ba ka dei ka skul kaba la rim tam hapoh ka jylla.
Haba ïoh ban ïakren bad ka Principal jong ka Khasi Jaiñtia Presbyterian KJP Higher Secondary School ha ka Lah Sngi U Blei ka 22 tarik u Jymmang 2023, ka Kong C. Allya ka la pynpaw ïa ka jingsngewsih bad ka jingpait dohnud kaba khraw bha halor kane ka jingjia kaba khlem shym la lah ban poi pyrkhat.
“Kum ka skul naduh ka Managing Committee, ki nonghikai, ki non-teaching staff, ki khynnah skul, ngim don kyntien shuh ban batai ïa ka jingsngewsih bad ïa ka jingpait dohnud ka jong ngi kum ka skul halor kane ka jingjia”, la ong katei ka Principal.
Katei ka Principal ka la ong ba katei ka skul ka dei ka skul kaba la seng da ki ‘Missionary’ naduh ki 1892 snem bad ka long ka skul kaba la ai ïa kata ka jingshakri ka jong ka ïa ki khynnah skul kynthei jong ka sor Shillong bad ka dei ka skul kaba nyngkong eh jong ka jylla bad ka long ruh ka skul kaba ai jingnang jingstad ïa ki kynthei naduh ki por kiba mynshwa haduh mynta.
Katei ka Principal ka la ïathuh ba katei ka jaka pule ka la dep dap 131 snem hynrei da ka jingpluh jong katei ka skul la hap ban duh noh ïa ka jingtei kaba itynnad tam khamtam ba ka dei ka jingtei kaba la rim bha bad na ka liang ki nongpynïaid skul ki la pyrshang ban pynnneh ïa katei ka jingtei kaba la rim tam hapoh sor Shillong hynrei da kane ka jingjia la hap ban duh noh ïa katei ka jingtei.
“Ngi la pyrshang ban pynitynnad ïa ka ba kan long kawei na ki jingtei kiba itynnad hangne hapoh sor Shillong hynrei da kane ka jingjia, ngi lah duh noh ïa kane kawei na ki jingtei kiba itynnad”, la ong katei ka Principal.
Shuh shuh katei ka Principal ka la ong ba lyngba kane ka jingpluh, ka skul ym tang ba ka la don duh noh ïa ka jingtei hynrei ka la hap ban duh lut ïa ka histori jong ka skul baroh kawei, ïa ki kot ki sla ba donkam bad kiwei kiwei ki jingdonkam kiba ka skul ka don bad ka la lum la kumba 131 snem.
Na ka liang jong katei ka Principal ka la ong ba kumba ka long ïa katei ka skul la seng ha ka kyrteng jong U Blei bad kumta kum ka skul baroh kawei ki don ïa ka jingngeit ba kane ka jingjia ka long kaei kaba da tip da U Blei.
“Ngi shu pdiang beit ba kita kiei kiei baroh khoit ki dei ki jingpynïaid ba stad jong U Blei bad ngi ngeit skhem ba kum ka skul ngin nang lah ba ngin kyntiew biang ïa kane ka skul bad ba ngin kyntiew biang ïa ka burom ka jong ka skul kaba ka la long ka burom ïa ka Jaitbynriew ka jong ngi naduh ki spah snem kiba mynshwa”, la ong ka Principal.
Katei ka Principal ka la pynpaw ka jingsngewnguh kaba khraw ruh ïa baroh kiba la wan ban ïarap ïa ka skul khamtam ïa ki u Rangbah Shnong, ki nongkitkam jong ka Dorbar Shnong Mission Compound, ki seng kynthei, ki samla bad baroh ki nongshong shnong jong katei ka shnong kiba la wan ban ïarap bad sei ïa ki khynnah kiba sah hostel ha katei ka skul.
Katei ka Principal ka la pynpaw ruh ka jingsngewnguh ïa u Myntri Rangbah ka jylla, u Conrad K Sangma uba la wan hiar bak sha katei ka jaka, ki nongmihkhmat bapher bapher, ki ophisar, ki nongkitkam jong ki balang bapher bapher, ka managing committe jong katei ka skul, ki khynnah skul bad kiwei kiwei kiba la wan ban ai ïa ka jingïarap bad ka jingsngewlem.
Ha kaba ïadei bad ka jinglong skul, katei ka Principal ka la ong ba na ka liang ka skul kan pyrshang ban pynlong biang ïa ka skul la shem taïew. Kumta ka la kyrpad ïa ki kmie ki kpa jong kitei ki khynnah skul ba kim dei ban khuslai eiei na ka bynta ki khun jong ki namar ka skul ka dang don sa ar ne lai tylli ki ïing mala hapoh katei ka phyllaw ban pynlong skul bad ban pynïaid shaphrang ïa ka jingshim klas.
Katei ka Principal ka la ong ruh ba na ka liang ka skul ka kloi ban pdiang sngewbha ïa kino kino ki jingïarap lada ka long ha kino kino ki liang namar ba ka skul ka donkam bad ka hap ban sdang biang naduh kaba sdang ïa kiei kiei baroh.
Katei ka Principal ka la ong ba kam lah ban batai ïa ka bailut baisep namar ka ding kaba la bam ïa katei ka skul ka la bam lut nadong shadong khlem sah eiei shuh.
Haba kylli halor ka daw jong katei ka jingpluh, katei ka Principal ka la ong ba baroh ki kwah ban tip ïa ka daw hynrei ka long kaba sngewsih ba na ka liang ka skul ruh kam tip satia ïa ka daw jong katei ka jingjia namar katei ka jingjia ka la jia ha ka por shiteng miet bad ka por ba sdang katei ka jingpluh ruh ym da don jingtip bha kaba tikna hynrei la shu antad ba ka la jia ha ka por 1 ne 2 baje eiei mynmiet.
Katei ka Principal ka la ïathuh ruh ba na ka liang ka skul ka la ujor da ka ejahar halor kane ka jingjia bad na ka liang ki pulit ki la shu mutdur ba ka dei na ka daw ba ka don jingthut ha ka liang ka bording. Hynrei ïa ka daw kaba shisha ym pat lah satia ban ong namar ka jingtohkit halor kane ka jingjia ka dang ïaid shakhmat.
