Mumbai, Jymmang:
Ha ka jingialehkai kaba lai bad ba khatduh jong ka jingiakhun Hockey hapdeng ka India bad Australia ha Adelaide, ka khubor ka iathuh ba ki arngut ki thei ialehkai ka ri kita ka Savita kum ka kapten bad ka nongialehkai ‘defend’ ba tbit ka kynhun ka Nikki Pradhan ki la lah mynta ka kynti ban kynjoh sha u mawjam ba kongsan tam eh ha ki kata sha ka 250 International Caps ba ki lah ialehkai bad shimbynta ha ki jingialehkai bapher bapher na ka bynta ka ri.
Naduh ba ka Savita ka la lah ban pynpaw ialade shakhmat ha ka Spar Cup Four Nations Tournament ha Durban ha u snem 2009, katei ka nongialehkai ka lah wan shakhmat ha ryngkat bad ki kyrdan bapher bapher ba ka lah poi bad kaba lah iai pynskhem shuh shuh ka jaka jong ka ha ka kynhun da ki katto katne ki rukom ialehkai ba tbit jong ka ha baroh shi lynter jong ki snem ba lah leit noh.
Katei ka nongialehkai ka lah khur ruh ia shibun tylli ki khusnam ha ka jingim ialehkai ka jong ka ha ki snem ba lah leit noh kaba kynthup naduh ka khusnam Arjuna. Ka long ruh ka atiar ba hakhmat jong ka kynhun ialehkai ka ri kaba lah thaw ia ka histori ha ka jinglah jong ka ban wan ha ka jaka ba saw ha ka Tokyo Olympic.
Shuh shuh ruh katei ka nongialehkai ka long ruh shi bynta jong ka kynhun kaba lah shimbynta ha ka Olympic 2016 ha Rio bad ka long ruh ka dkhot jong ka kynhun kaba lah rung sha ka quarterfinal jong ka Women’s World Cup ha u snem 2018 ha London. Kumta, kum ka kapten ka la lah ruh ban btin lynti ia ka kynhun shaduh ka jingkhur ia ka takma Rnong ha ka CWG 2022 ha Birmingham bad ka jingpynksan shuh shuh ia ka kynhun shaduh ka jinglah ban pynioh ia ka trophy jingjop ha ka FIH Nations Cup kaba lah iarap ia ka kynhun ban shah jied na ka bynta ka FIH Pro League 2023-24.
Haba phai sha ka kam ialehkai jong ka Pradhan ka long ba katei ka nongialehkai ka lah pynpaw shakhmat ialade ha ki lympung leit iakhun Shabar-ri kata ha ka por ba ka kynhun ka lah leit ban ia aireng sha South Africa ha u snem 2016. Kumta katei ka nongialehkai ka lah kylla lon gruh ka thei ialehkai Hockey ba nyngkong na ka jylla Jharkhand ka jong ka ban mihkhmat ia ka ri sha ka Olympic ha kaba ka lah ioh ban shimbynta lem bad ka kynhun ha ka Olympic 2016 ha Rio de Janeiro bad ka long ka shibynta ka dkhot jong ka kynhun ialehkai ka ri kaba lah shimbynta ha ka Tokyo Olympic.
Katei ka nongialehkai ka ri ka long ruh ka shibynta jong ki katto katne ki jingkhur jingjop ka kynhun kaba kynthup ruh ka jingiadonlang ka jong ka ha kaba ka kynhun ka lah khur ia ka takma Ksiar ha ka Women’s Asia Cup 2017 bad ka takma Rupa ha u snem 2018 ha ka Women’s Asian Champions Trophy.
