Shillong, Jymmang 22:
Ka Jyntru ka la pynjem khnap ïa ka Seng Samla Laitryngew haduh 9-4 kol ha ka Group-A (Shillong zone) jong ka lympung ïalehkai Meghalaya State League 2023 ha ka Lah Sngi U Blei ha madan Third Ground, Polo.
U Emanbha Marbaniang u la ïoh ban thep marwei haduh saw kol tang hapoh 20 minit ha ka kylla miet kita ha ka minit kaba 74, 79, 87 & 90+5.
Kumba ka paw ka Jyntru bad ka Laitryngew ki la khmih lynti ban khur ïa ka jingjop namar dangshen ha ka jingïalehkai ba la dep ki la mad ïa ka jingshah rem.
Ha ka kylla step kine ki kynhun ki la ïakhaid mar 3-3 kol. U Balanstar Taro (14′) u la ïoh ban thep kol nyngkong eh na ka bynta ka Jyntru, hynrei u Johnplayson Lyngdoh (15′) u la lah ban pynïakhaid kylla na ka daw ka jingbym lah ban bishar bniah da ki rangïalehkai ‘dien ka Jyntru.
Hadien katto katne por u Banteilang Nongkynrih (18′) u la ïoh ban thep ïa ka kol ba ar na ka bynta ka Laitryngew, hynrei ka Jyntru ka la lah ban pynïakhaid biang na ka daw ka jingbakla thep hi da u rangïalehkai ka Laitryngew ha ka minit kaba 22. Kane ka dei na ka daw ba u rangapkol um shym la don hapoh ‘box’ ha ka por ba shut ïa ka free-kick, hynrei u Monush Lapang u la ïoh ban thep kol da kaba suk.
U Banteilang u la ïoh ban thep kol biang na ka bynta ka Laitryngew ha ka minit kaba 34 hadien ba u la ïoh ban thep da ka khlieh ha ka free-kick. Hashwa ban kut artad ka jingïalehkai jong ka kylla step u Badaminot Nongphlang (45’+1) u la lah ban pynïakhaid kylla na ka bynta ka Jyntru.
Hadien ba la bteng biang ïa ka jingïakhun jong ka kylla miet, ka Jyntru ka la ïoh ban thep ïa ka kol kaba san lyngba u Jefferson Nongphlang (74′) bad ha kajuh ka minit u Emanbha u la ïoh ban thep ïa ka kol kaba nyngkong hadien ba u Ferenstar Kharkongor (75′) u la lah ban pynphai kylla na ka bynta ka Laitryngew, hynrei ka la shah tam da 5-4.
Hadien katto katne por u Emanbha u la ïoh ban thep ïa ka kol ba ar ha ka minit kaba 79. Hadien kata une u rangïalehkai u la ïoh ban thep biang sa ar kol na ka bynta ban khur syndon ïa ka jingjop.
Ha ka jingïakhun jong ka Group-B (Jowai zone), ka Niaw Wasa United ka la lah ban pynliem ïa ka Youth Club Pdengkarong da 2-1 kol, katba ka Wasa FC ka la jop da 3-1 kol ïa ka Warima Youth Club ha ka Group-D (Tura zone) bad ka Riangdo YSCA ka la pynliem noh ïa ka Mawten SC da 1-0 kol ha ka Group-C (Mawkyrwat zone).
Ïa katei ka jingïakhun ba la pynlong ha Kiang Nangbah Stadium kaba ha Jowai, ka Niaw Wasa ka la shah thep kol nyngkong lyngba u Marshial Nongrum na ka bynta ka Pdengkarong ha ka minit kaba 27.
Hynrei u Dashngaiñ Sukhlaiñ u la lah ban pynïakhaid kylla ha ka minit kaba 39 na ka bynta ka Niaw Wasa. Kane ka la wan lyngba ka free-kick ha kaba u Sukhlaiñ u la lah ban pynurlong ïa kane ka kabu ksiar.
Hashwa ban kut ka jingïalehkai jong ka kylla miet u Dreamson Suchiang u la ïoh ban thep kol ha ka minit kaba 83 na ka bynta ka Niaw Wasa. Kane ka la wan lyngba ka free-kick ha kaba u Suchiang um shym la pynlehnohei ïa kane ka kabu ksiar.
Ha kawei pat ka jingïakhun kaba la long ha madan MDSA kaba ha Mawkyrwat, ka Riangdo ka la ïoh ban thep shi kol lyngba u Phinilboy Rashik (70′) na ka bynta ban pynlong ïa kane ka kynhun ban khur ïa ka jingjop pyrshah ïa ka Mawten.
Haba phai sha kawei pat ka jingïakhun kaba la long ha madan Chandmari kaba ha Tura, ka Wasa FC ka la ïoh ban lamkhmat na ka Group-D hadien ba ka la khur ïa ka jingjop da 3-1 kol ïa ka Warima.
Na ka Wasa la ïoh ban thep kol lyngba u Koushik Rabha (8′), Silgrik Momin (41′) bad u F. Momin (90’+3), katba ka Warima ka la lah ban pynphai kylla shi kol lyngba u Tremarchwal Ch Marak (85′).
Da kane ka jingjop ka Wasa ka la kamai 7 point, katba ka Khliehmawlieh kaba la wan ba-ar ka la kamai 6 point.
