Shillong, Jymmang 22:
Ka Riwar Mihngi Football Association (RMSA) ha ka 20 tarik ka la pynkut noh ïa ka lympung ïalehkai Under-15 League Tournament 2023 kaba la sdang naduh u Kyllalyngkot 2023.
Ïa ka nam lahduh ha kane ka lympung la rah da ka Riwar Mihngi XI. Kane ka wan urlong hadien ba ka lah ban pynliem noh ïa ka Mawprem S.C lyngba ka shi kol ba la thep da u Bantiplang Khongnoh ha ka kylla miet jong ka jingai por tam (extra time).
Ïa ka Riwar Mihngi XI la ïalam da u Bah Stephanfield Lanong uba dei uwei na ki rangïalehkai ba paw jong ka thaiñ Pynursla ha ki por ba la leit. Hapoh kane ka jingïalam jong u, u la lah ban ïohi ba ki don byllai ki samla donsap na ka thaiñ Riwar Mihngi ki ban paw ha ki por ban dang wan.
Ïa kane ka lympung la sdang ha ka 27 tarik u Kyllalyngkot 2023 da ka jingwan ïashim bynta jong phra tylli ki kynhun bapher bapher jong ka thaiñ Riwar Mihngi. Ha kane ka sngi kut la wan sakhi lang da u Bah Wanshanbor Kharkrang, Treasurer ka Meghalaya Football Association kum u kongsan bad la ïa donlang ruh u Bah Aiborlang Khongjee uba long u nongaibuit ka Riwar Mihngi Football Association ryngkat u Rangbah Shnong ka Shnong Pynursla, lem bad ki nongïalam jong ka R.M.F.A.
Ka Riwar Mihngi XI kaba la long la lahduh ha kane ka lympung ka la khur ïa ka song pisa kaba T.10,000, katba ka Mawprem SC ka la ïohpdiang ïa ka khusnam kaba T. 7000 ryngkat ki trophy. Katei ka synjuk ka la rai ruh ban ïarap lang ïa ki kynhun kiba wan ïashim bynta mar T. 4000.
Shuh shuh ha katei ka sngi ka synjuk ka la wer ruh ïa ki klob jong ka thaiñ Riwar kum ka Pomlum Wahrew- Umsyiem- Nongkwai -Tishang – Nongjri ba kin pynïasoh (Affiliation) namar kane ka synjuk kan sa sdang noh shen ïa ka Football League 2023.
Ïa ki ‘form’ ban pynïasoh lah ban ïoh da kaba phone ne Whatsapp ha ki number 9612095234 & 7005247841. Ka jingpynïasnoh (affiliation) kan kut noh ha ka 20 tarik u Jylliew mynta u snem.
Nalor kata, ka Riwar Mihngi Football Association ka la wer ïa ki shnong, ki klob, ki ’riew shimet kiba don mynsiem ban kyntiew lang ïa ka jingïalehkai phutbol ha ka thaiñ ba kin ïashim bynta ha ka Women’s League Football 2023 ka ban sa sdang shen bad ka por ai jingtip ban ïashim bynta kan kut ha ka 3 tarik u Jylliew 2023.
