Shillong, Jymmang 22:
Ka kynhun ïalehkai jong ka Phudmuri ka la khur ïa ka nam lahduh ha ka lympung ïalehkai 1st Knockout Mawlai Football Tournament 2023 ba la pynïaid da ka Hynñiewtrep Achik National Movement (HANM) Mawlai Circle.
Kane ka nam jop ka la wan urlong hadien ba ka lah ban pynliem noh ïa ka Synrop da 3-2 kol ha ka jingïakhun final kaba la long ha ka Lah Sngi U Blei ha Madan Heh kaba ha Mawlai Phudmuri.
Ha kane ka sngi la ïadon lang u Pa’iem Ainam Manik Syiem uba long u Syiem ka Hima Mylliem kum u kongsan, u Bah Lamphrang Kharbani, President ka HANM kum u kymbud kongsan, u Bah Kyrshan Rapsang, President HANM Mawlai Circle, bad ki nongkitkam jong ka seng ha ryngkat ka jingwan kyrshan lang ki paidbah ban ai jingkyrshan ïa ki nongïalehkai.
Haba phai sha kane ka jingïakhun baroh ar kynhun ki la ïakhun tyngeh naduh kaba sdang. Pynban dei ka Synrop kaba la ïoh ban thep kol lyngba u Meban Wahlang bad u Basuk Bina. Katba na ka liang ka Phudmuri la thep da u Mark Gareth Shabong, Wanshwa Sohtun bad u Robert Khongriah na ka bynta ban khur syndon ïa ka jingjop.
Lyngba kane ka jingjop ka Phudmuri ka la khur ïa ka song pisa kaba T. 40,000 bad ka Synrop ka la ïoh T. 20,000 ryngkat ki trophy ba la sam da ki dkhot jong kane seng.
Kum ban shu pynkynmaw ïa kane ka lympung la sdang naduh u Ïaïong mynta u snem da ka jingwan ïashim bynta jong 32 tylli ki kynhun.
