Shillong, Jymmang 22:
Ka Meghalaya Boxing Association (MBA) ka la pynthymmai ïa ki nongkitkam na ka bynta ka samoi treikam kaba saw snem (2022-2026) myn ha ka 20 tarik mynta u bnai.
U Bah Cernelius Kharhunai u la shah jied kum u President bathymmai bad ïa ka kam Secretary la pynkhamti ha u Bah Dondor Marweiñ.
Ha katei ka sngi la thung ruh ar ngut ki Vice President, kita u Johnwell G. Momin bad u Bah Despitol Sun, katba u Bah Khraw Kharmawphlang bad u Bah Jimy Bosco Shadap la thung kum u Joint Secretary. Ïa ka kam Treasurer la thung ïa u Bah Daniel W. Marbaniang.
Nangta la thung ruh ïa hynriew ngut ki dkhot, kita u Bah Teibor Kharkongor, Chongkam G. Momin, Noyontho Marak, u Kyrshanlang Wahlang, Wanbait Ksoo bad u Bah Hubert Marbaniang.
Ïa katei ka jingïalang la pynlong ha ICSSR Guest House ha ryngkat ka jingïadon lang ki nongpeit pyrman na ka Boxing Federation of India (BFI) kita u Digvijay Singh (Treasurer bad la synran lang da u Hemanta K. Kalita (Secretary General ka BFI), katba na ka Meghalaya State Olympic Association (MSOA) la mihkhmat da u Bah P. Laloo, Joint Secretary. Ïa kane ka ilekshon la pynïaid da u Bah Mawshabor Ryntathiang, Advocate.
