Toronto, Jymmang:
Uwei u rangbah 44 snem uba dei u nongshong shnong ka India, u la shah pynngat hapoh ki kyndon pynkheiñ aiñ jong ka jingpyniap briew hadien ba u la pyniap ia kawei ka jaitbynriew Sikh hapoh ka nongbah Brampton jong ka ri Canada ha ki khyndiat sngi jong ka taiew ba la leit.
Ki pulit ki la iathuh ba u Nav Nishan Singh u la pyniap ia ka Davinder Kaur (43 snem ka rta) ha ka Sngi Thohdieng hapoh ka Sparrow Park kaba don ha ka nongbah Brampton jong ka Canada.
Ki pulit ki la iathuh ruh ba hadien ba ki la ioh jingtip shaphang katei ka jingjia, ki la leit mareh wut-wut sha katei ka jaka. Hadien kata ki la shem ia katei ka briew ba ka la thiah lyngkrang ha kawei ka lynti iaid kjat ha katei ka jaka.
Wat la ki pulit ki la ialeh katba lah ban pynim ia ka hynrei namar ka jingjur palat jong ka jingmynsaw bad ki jingshitom ha ka met, ka la dkut mynsiem noh ha katei hi ka jaka ba ka la kyllon.
Hadien katto katne kynta, ki pulit ki la ioh kem noh ruh ia u Singh tang kumba katto katne ka jingjngai na katei ka jaka ba la shem ia katei ka briew bad kumta la pynngat noh ia u hapoh ki kyndon pynkheiñ aiñ jong ka jingpyniap briew bad la kem noh ruh ia u.
Ki pulit ki la iathuh ba kitei ki 2 ngut ki dei kiba la ju don jingithuh baroh shi katta, hynrei ym pat lah pat ban tip ia kaei ka daw kaba la wanrah ia katei ka jingjia ha katei ka sngi bad ym lah ruh ban tip ia ka jingdon jingiadei hapdeng jongki 2 ngut.
Namarkata, la ong ba ki pulit ki donkam ban pynïoh shwa ia ki ‘Video’ lyngba jong ki camera CCTV kiba la buh ha katei ka jaka khnang ban sngewthuh ia kaei kaba jia ha katei ka sngi.
La ialam ruh ia u Singh hakhmat ka ïingbishar Brampton ha ka step Sngi Saitjaiñ.
Ka nongbah Brampton ka don kumba 7,00,000 ngut ki paidbah nongshong shnong, ha kaba ka long ruh ka nongbah kaba kham bun bha ki paid Punjabi.
