Lakhimpur, Jymmang:
Ki bor pulit jong ka jylla Assam ha ki khyndiat sngi kiba la leit noh ki la pyntip ba ki la pynsdang da ka jingleit thwet kaba jur ïa uwei u nonghikai jngi uba dei ruh u nongkhmih ka jaka ai jinghikai kilan met jong ka Sports Authority of India (SAI) kaba don ha ka thaiñ Salalgaon, Assam na ka daw jong ka jingdonkti ban jrong kti khlem raiñ ïa ki samla nongïalehkai, kynthup ïa ki khynnah rit kiba leit ban shah ai jinghikai ha katei ka shlem.
Halor katei ka jingjia la ïathuh ba na ka liang ki bor pulit ki la pynrung ruh da ka mokotduma hapoh ki kyndon jong ka Protection of Children from Sexual Offences (POCSO) Act pyrshah ïa utei u nonghikai. U nonghikai u ba la shah pynrung ha ki kyndon jong ka POCSO Act u dei u ba la tip kyrteng kum u Mrinal Basumatary.
Kat kum ki jingïoh lum jingtip la ïathuh ba ki kam khlem akor jong utei u nonghikai ki la paw pen ryngkew hadien ba ki katto katne ngut ki samla kiba shah ai jinghikai ha SAI training centre, Salalgaon, North Lakhimpur ki la kynnoh ba u Mrinal u la donkti ban jrong kti khlemakor ïa ki katto katne ngut ki samla ha ka por ba la pynlong ïa ka rynsan jied nongïalehkai (selection trial).
Hadien katei ka jingujor, la ïathuh ba na ka liang ki bor ba halor jong ka SAI ki la leit ban pynrung da ka FIR ha Paltan Bazar PS, Guwahati.
Kat kum ka jingpyllait khubor jong ki bor ba halor jong ka SAI, ki la pyntip ba katei ka jingjia ka dei kaba ktah jur ïa ka longrynnieng manrynnieng jong ki khynnah bad samla ïalehkai bad na ka liang ki bor pulit ki dei ban pynlong da ka jingtohkit kaba jur.
Tad haduh ba la ïoh ïa kane ka khubor la ïathuh ba hadien ka jingshah pynrung mokotduma, utei u nonghikai u la phet rieh na ki bor ka aiñ bad ki bor pulit ka jylla ki la sdang ban pynlong ïa ka jingleit thwet kaba jur khnang ban ïoh kem noh ïa u.
