Imphal, Jymmang:
Ki bor sorkar jong ka jylla Manipur ha ki khyndiat sngi kiba la leit noh ki la pyntip ba ka sorkar kan sa pynbiang ïa ki jingdonkam kiba ïadei bad ka lad pule puthi sha palat 4,700 ngut ki khynnah/samla pule kiba la shah ktah jur na ka jingmih jong ki jingïakajia bad jingïaumsnam kiba la jie ha ka jylla Manipur ha ki khyndiat taiew kiba la leit noh.
Kat kum ka jingïathuh jong ki bor sorkar, ki la pyntip ba shen ka sorkar kan sa pynsdang noh ïa ka rynsan sam jingïarap sha baroh kitei ki khynnah/samla pule. Ki mar jingïarap kiba ka sorkar kan sam sha kitei ki lanot kin kynthup ïa ki kot pule bad ki jaiñ phong skul/kolej. Nalor katei ka lad jingïarap, na ka liang ka tnat pule puthi jong ka jylla Manipur ka la pynkhreh ruh ban wanrah ïa ki nonghikai (volunteer) ki ban pynbiang ïa ki lad jingpule na ka bynta kitei ki lanot.
Ïa ki rynsan sam jingïarap yn pynlong lyngba ki shlem treikam jong ki zonal education officer bad ka tnat Directorate of School Education, Manipur.
Ïa kitei ki sienjam jong ka sorkar jylla ban pynbiang ïa ki lad jingïarap la pynbna da u Myntri ka tnat Pule Puthi jong ka jylla – Basantakumar Singh ha ka jingïalang bad ki lad pathai khubor kaba la pynlong ha ka nongbah Imphal. Na ka liang u Myntri u la pyntip ba ka sorkar jylla ka la shim ïa ki lad ki lynti ban lum jingtip shaphang ki khynnah/samla pule baroh kiba la hap ban mih noh na la ki jong ki ïing ki sem hadien ka jingmih jong ki jingïakajia bad jingïakulmar ba jur.
U Myntri u la pyntip ba tad haduh kane ka kynti kaba mynta la ïoh jingtip ba ki don haduh 4,747 ngut ki khynnah/samla pule (pre-primary – class XII) kiba la hap ban mih noh na la ki jong ki ïing ki sem ban leit sah shipor sha ki ïing dara ba la pynbiang da ka sorkar bad da ki tnat shipai.
U la pyntip ba na ki 4,747 ngut ki khynnah/samla pule kiba la hap ban mih na la ki jong ki ïing ki sem; 2,217 ki sah ha ki ïing dara kiba don ha ka thaiñ Bishnupur district, 932 ngut ha ka thaiñ Kangpokpi district bad 66 ngut ha ka thaiñ Kakching district.
Kat kum ki jingïoh lum jingtip la ïathuh ba ki la don haduh 70 ngut ki briew kiba la duh ei ïa la ki jong ki jingim bad 236 ngut kiba la ïoh ïa ki jingmynsaw na ki jingïakajia bad jingïaumsnam kiba la jia ha ka jylla. Ki jingïakajia bad jingïaumsnam ha ka jylla Manipur ki la jia hadien ka jingdawa jong ki paidbynriew Meitei ban ïoh ïa ka kyrdan Scheduled Tribe (ST).
Haba phai sha kawei pat ka khubor, la ïathuh ba na ka liang ka Sorkar Manipur ha ka 21 tarik mynta u bnai hadien ka jingïoh jingtip shaphang ka jingmih biang jong ki jingïakajia ha ki katto katne ki thaiñ jong ka jylla, ka la pynmih da ka hukum ban pynjlan shuh shuh ïa ka jingpynsangeh trei kam ïa ka ‘mobile internet’ tad haduh ka 26 tarik mynta u bnai.
Shuh shuh haba phai sha kawei pat ka khubor, na ka liang u Myntri Rangbah ka jylla – N Biren Singh ha ka sngi ba u la leit ban ai jingkren ha ka sngi rakhe ïa ka “Anti-Terrorism Day” kaba la pynlong ha Old Secretariat – Imphal ha ka Sngi Blei ba la dep u la ïawer ïa ki nongshong shnong ka jylla ba kin phai khmat sha ka suk ka saiñ bad kumjuh ruh ban kiar na ki kam beaiñ kiba lah ban wanrah ïa ka shongsyier shong smiej ha ka jylla.
