Shillong, Jymmang 22:
Ka jingsam bording ha Byrnihat, Jorabad, Khanapara, Killing, Baridua, Maikhuli, Philingkata bad kiwei ka la thut hadien ba kawei ka trok ka la rat ïa ki kor ki bor kiba don jingïadei bad ka jingpynpoi bording.
Ka khubor na ka Meghalaya Energy Corporation Limited (MeECL) ha ka Lah Sngi U Blei ka ïathuh ba naduh ka 21 tarik Jymmang, ka la don ka jingthut ha ka jingsam bording na ka daw ba kawei ka trok jong ka M/s Shyam Century ka la kum leit tynrah bad rat ïa ki kor pynpoi bording.
Kine ki kor pynpoi bording ki ïadei bad ka 33KV EPIP bad 33KV Byrnihat Feeder. Na ka jingrat jong katei ka trok ïa ki kor sam bording, haduh 12 tylli ki ‘post’ ilektrik ki la khyllem ha ki jaka bapher-bapher, la ïathuh ka tyllong khubor.
Na ka liang ki bor ba dei khmih ki la ai da ka jingujor sha ki pulit pyrshah ïa katei ka kompani halor ka jingleh thurmur. La ong ruh ba ki nongtrei jong ka MeECL ki dang don ha ka kam ban maramot bad la bthah ïa ki ban trei ha ki ar bynta. Hynrei la ong ba kan dang shimpor ban maramot bad ban pynpoi biang ïa ka bording sha kitei ki jaka.
