Shillong, Jymmang 22:
Lai tylli ki district ha kane ka Jylla ki la wan kham shadien ha ka liang ka jingpyntreikam ïa ka skhim umbam umdih Jal Jeevan Mission (JJM), wat lada ka Jylla ka paw ba ka kham biang ha ka rukom pyntreikam ïa kane ka skhim kaba wan na ka Sorkar Pdeng.
Kine ki lai tylli ki district ki long ka East Khasi Hills, East Jaiñtia Hills bad West Jaiñtia Hills.
La ong ba ka jingpynpoi um lyngba ki kor sha ki ïing ha kine ki district ki dang duna bad kine ki district ki dang don kham shatrai ban ïa kiwei pat.
Ka jingïaid shakhmat ka rukom pyntreikam ïa ka JJM ha East Khasi Hills ka dang long kumba 36.45%, ha East Jaiñtia Hills kumba 36.72%, bad ha West Jaiñtia Hills kumba 40.03%.
U Myntri ka tnat Public Health Engineering, u Marcuise N Marak u la lum ïa ki ophisar kane ka tnat ban khmih ïa ka rukom pyntreikam ïa ka JJM ha ka Jylla kynthup ha kine lai tylli ki district.
Une u Myntri u la ong ba donkam ban kham ngiat ïa kine ki district ban poi kham shakhmat khnang ba kin long lang kum kiwei pat ki district.
Halor ka daw ba suki ka jingpyntreikam ïa ka JJM ha kine ki district, u Marak u la ong ba ka jingsuki ka dei hi na ka daw bym pat lah ban tang bording ilektrik ban pyndait ïa ki kor pom um.
Nalor kata, u la ong ba ki don ki projek kiba shu sahkut namar bym ïoh ban tan bording ilektrik bad bun na ki projek ki dei kiba donkam lang ban treikam lang ki kor pom um.
U Marak u la ïathuh ba shen un sa ïakynduh ïa u Myntri ka tnat bording, u AT Mondal ban pynsngew ha u ïa kane ka jingeh khnang ban lah pynbeit lyngba ki lad ki lynti kiba la shem.
