Guwahati, Jymmang:
Ki heh sorkar ka tnat Central Bureau of Investigation (CBI) ha ki khyndiat sngi kiba la leit noh ki la pyntip ba ki la pynrung da ka mokotduma pyrshah ïa ki 2 ngut ki heh sorkar ka Northeast Frontier (NF) Railway na ka daw jong ka jingdonkti jong ki ban dawa pisa na kawei ka para nongtrei kaba donkam ban shim shuti khyndiat sngi.
Kat kum ka jingïathuh jong ki heh sorkar ka CBI, ki la pyntip ba hadien ka jingïoh ïa ka jingujor, ki nongtrei ka CBI ki la leit ban pynrung noh da ka mokotduma pyrshah ïa kitei ki 2 ngut. Ki 2 ngut kiba la shah pynrung mokotduma ki kynthup ïa u nongtrei senior trade instructor (STC/NBQ) – Lakhindar Prasad bad u nongtrei stenographer – Ramesh Kumar Ranapaheli.
Na ka liang ki heh sorkar ka CBI ki la pyntip ba ïa ka jingujor pyrshah ïa kitei ki 2 ngut la leit ban ujor da uwei u briew u ba la tip kyrteng kum u Ranjit Mondal – u nongshong shnong ka thaiñ Goalpara, Assam.
Na ka liang u Mondal u la kynnoh ba u Lakhindar Prasad u la donkti ban dawa pisa na ka Shruti Sangma (nongtrei technical ka tnat NF Railway) ha ka por ba ka la leit ban pan shuti na u. Nalor u Lakhindar, la ïathuh ba u Ramesh Kumar Ranapaheli ruh kumjuh u la donkti ban dawa pisa na katei ka nongtrei bad bthah ruh ba ka dei ban siew ha ka sngi Saitjaiñ ba la dep.
Hadien ka jingpynlong ïa ki jingtohkit, na ka liang ka CBI ka la pynrung da ka mokotduma hapoh ka Sections 120B jong ka IPC bad Section 7 jong ka Prevention of Corruption Act. Na ka liang ki bor sorkar ka CBI ki la pyntip ruh ba ki la sdang ban pynlong ïa ki jingtohkit kiba bniah halor katei ka jingjia.
Kum ban shu ïathuh hangne, na ka liang ki bor pulit jong ka jylla Assam ha ki khyndiat bnai kiba la leit noh ki la ïoh ban kem ïa bun ngut ki nongtreikam sorkar kiba ju donkti ha ki kam bam sap bad kumjuh ruh ha ki kam dawa pisa na ki ‘riew paidbah kiba leit mih sha ki shlem trei kam na ka bynta ki kam ki jam ba donkam jong ki. Halor katei, na ka liang u Myntri Rangbah jong ka jylla – Himanta Biswa Sarma u la pynmih ruh da ka jingmana bad pyntip ba ka sorkar jylla kan nym ai lad ïa kino kino ki nongtreikam sorkar ba kin don bynta ha ki kam shim pisa beain na ki riew paidbah. U la pynbna ba ka sorkar jylla kan ai da ka jingsneng kaba tyngeh bad kumjuh ruh ruh ban weng kam pyrshah ïa kino kino ki nongtrei sorkar kiba donkti ha kitei ki kam beain.
