New Delhi, Jymmang:
U khlur ialehkai kawang Sum ka ri India uba long ruh u lahduh jong ka lympung ialehkai Olympic u Neeraj Chopra, u lah wanphai sha ka kyrdan ba 1 ha ka sien ba nyngkong jong ka kam ialehkai ka jong u’; kata hadien ba lah pyllait paidbah ia ka thup kyrdan ba thymmai jong ka jingialehkai kawang Sum da ka World Athletics.
Kumta u Chopra u bat mynta ia katei ka kyrdan ha ka thup ha ryngkat bad ki 1455 dor-thong; da 22 dor-thong ka jinglah jong u ban tam shakhmat ia u nongialehkai na Grenada uba iai bat kum u lahduh ha ka pyrthei u Anderson Peters (1433) bad u nongkhur takma Rupa na ka Tokyo Olympics u Jakub Vadlejch na Czech Republic u wan mynta ha ka kyrdan balai da 1416 dor-thong.
Ka khubor ka pynkynmaw ruh ba u Chopra u lah kiew sha ka kyrdan ba 2 ha ka pyrthei ka long ha ka 30 tarik u Nailar jong u snem ba lah dep, hynrei uba lah iai sahkut ha katei ka kyrdan hadien jong u Anderson Peters naduh kata ka por. Kumta ruh ha u bnai Nailur jong u snem 2022,u Neeraj Chopra u lah rah ia ka thong jingjop na ka Diamond League Finals ha Zurich, ha kaba u lah kylla long u nongialehkai ba nyngkong eh jong ka ri ban khur ia ka trophy jingjop na ka tei ka lympung.
U long ruh u rangialehkai ba seisoh ha kaba u lah rah ia ka nam jop ha kaba sdang jong ka aiom ialehkai kata ha ka lympung iakhun ha Doha ka Diamond League ha ka 5 tarik u Jymmang da ka jinglah ban kawang ia u Sum ha ka jingjngai kaba 88.67m. Hadien katei ka jingjop, u pynkhreh mynta ban ia aireng sa ha ka FBK Games ha ka 4 tarik bnai ban wan ka ban sa long ha Netherlands ia kaba yn sa bud pat da ka lympung ialehkai ha Turku; Finland ka Paavo Nurmi Games naduh ka 13 tarik u bnai ban wan.
