Turin, Jymmang:
Na ka liang jong ka Italian Football Federation’s (FIGC) ka iathuh ba ka klob ialehkai phutbol jong ka lympung Serie A ka Juventus ka lah shah khate mynta da 10 dor-thong, hadien ba lah dep ban bishar bniah biang sa shisien ia ki 15 dor-thong ba nyngkong jong ka penalty kaba lah don ha ka klob baroh kawei halor ka jingleh beain ka jong ka ha kaba iadei bad ki kyndon iadie-thied rangialehkai.
Kumta katei ka jingdain kuna kaba thymmai sha ka klob ia kaba lah pynbna da katei ka synjuk ia kaba lah pynmih hukum da ka ingbishar, khlem pep ka lah ruh ban pynpulom noh ia ka jingkyrmen jong ka klob na ka bynta ka jingshah jied ka jong ka sha ka aiom ialehkai ka ban wan jong ka Champions League bad kaba lah niat ruh ia katei ka kynhun ialehkai Shabar na ka thup ba 4 ha ryngkat bad ki ar tylli ki jingialehkai ba dangsah ha ka aiom ailehkai ba mynta.
Kumba ka paw mynta, katei ka klob ka lah shimbynta bad ia aireng ha ki lympung ialehkai bapaw ka ri Europe ha man la ki 11 aiom ialehkai ba lah dep da kaba phai sha ki tarik ba mynshuwa jong u 2012. Kumta ruh ka iingbishar bahakhliehduh jong ka kam ialehkai kaba don ha ri Italy ka Sports Guarantee Board, ka lah khyllie biang ia ki 15 dor-thong penalty ia kaba lah wanrah da ka FIGC ha ka jingkyrpad jong ka iingbishar bad phah ruh ia katei ka jingjia ne ka mukotduma na ka bynta ka jingbishar kaba thymmai pyrshah ia ka klob.
Hynrei na ka liang jong katei ka klob ka iathuh ba ka don ia ka hok na ka bynta ban buh ia ka jingkyrpad ka jong ka ha kaba iadei bad katei ka jingpynshitom kaba thymmai sha ka Sports Guarantee Board bad ka klob ka don ia ka jingkyrmen ruh ba ka jingkhate ia ki dor-thong yn da pyndam noh pura ia ka ha ki khyndiat sngi ki ban wan. Kumba ka paw hi ka long ba katei ka kynhun ialehkai jong u Massimiliano Allegri kaba shong ha ka kyrdan ba 2 ha ka miej khein dor-thong jong ka lympung, mynta ka lah shah pynhiar sha ka kyrdan ba 7 bad ka don mynta da san dor-thong hadien jong ka klob kaba bat ia ka kyrdan ba saw ka AC Milan. Shuh shuh ruh ha ka thup kyrdan jong katei ka lympung ialehkai, ka Inter Milan mynta ka lah jam sha ka kyrdan ba 3, ka Atalanta bad Roma ruh kumjuh kiba lah kiew kyrdan da shi jaka.
