Aizawl, Jymmang:
Ki bor sorkar jong ka jylla Mizoram ha kane ka taiew kaba mynta ki la pyntip ba na ka daw jong ka jingïai bteng ki jingïakajia ha ka jylla Manipur, ki la don palat 7,500 ngut ki nong Manipur kiba la wan ban rieh tngen shapoh u pud u sam jong ka jylla Mizoram.
Kat kum ki jinglum jingtip la ïathuh ba tad haduh ka 5 baje janmiet jong ka Lah Sngi U Blei mynta ka taiew, ki la don haduh 7,527 ngut ki nong Manipur kiba dei na ka jaitbynriew Zo/Mizo kiba la wan ban rung shapoh u pud u sam bad leit rieh tngen ha ki shnong bapher bapher kiba don ha ki 8 tylli ki distrik jong ka jylla Mizoram.
Kat kum ka jingïathuh jong ki bor sorkar, ki la pyntip ba ka thaiñ Kolasib district kaba don markhap bad ka jylla Assam ka dei ka thaiñ kaba la don bun tam ki nong Manipur kiba la wan ban rieh tngen (2,685 ngut) bud sa ka thaiñ Aizawl district (2,386 ngut) bad ka thaiñ Saitual district (2,153 ngut).
Ki bor sorkar ki la pyntip ba ki la don ruh haduh 164 ngut ki nong Manipur kiba la leit ban rieh tngen ha ka thaiñ Champhai district, 36 ngut ha ka thaiñ Khawzawl district, 27 ngut ha ka thaiñ Serchhip district, 19 ngut ha Mamit district bad 57 ngut ha ka thaiñ Lunglei district. Ki bor sorkar ki la pyntip shuh shuh ba bun na kitei ki nong Manipur ki la ïoh ïa ki jaka rieh tngen ha ki ïing dara ba shipor bad don pat kiba la ïoh ïa ki jaka shong jaka sah na ki bahaïing hasem jong ki.
Haba phai sha kawei pat ka khubor, la ïathuh ba na ka liang u Myntri Rangbah jong ka jylla Mizoram – u Zoramthanga u la pynbna paidbah ba ka mat treikam kaba hakhmat eh ba la wanrah da ki nongseng ïa ka Mizo National Front (MNF) ka long ban pynïatylli ïa baroh ki paid Zo/Mizo kiba shong ba sah ha ka ri India bad kumjuh ruh ban wanrah ïa ki baroh hapoh ka jingkhmih jong kawei ka kynhun trei kam.
Katei ka jingpynbna jong u Myntri Rangbah ka la jia hadien khyndiat sngi ba ki 10 ngut ki MLA ka Manipur kiba dei na ka jaitbynriew Kuki lem bad ki nongïalam jong ka Indigenous Tribal Leaders’ Forum (ITLF) ki la pynmih ïa ka jingdawa ban ïoh da la ka jong ka jylla Rilum.
Ha ka jingai jingkren jong u Myntri Rangbah ha ka jingïalang kaba la pynlong ha ka sngi Thohdieng kaba la dep, u la pyntip ba ka mat jingdawa ba kongsan tam jong ka Mizo National Front (MNF) ka long ban wanrah ïa ka jingïatylli jong ki paid Zo/Mizo kiba shong ba sah ha ka jylla Mizoram bad ha ki jylla kiba markhap ban thaw ïa ka Greater Mizoram. U la pyntip shuh shuh ba katei ka jingdawa ka dei ka jingdawa kaba don ïa la ka jong ka nongrim bad kaba lah ruh ban urlong kat kum ki kyndon kiba hapoh ka Khyrnit ba 3 jong ka Konstitushon jong ka ri India.
Hynrei ha ka jingïalang, na ka liang u Myntri Rangbah u la pyntip pat ba ka sorkar Mizoram kan nym lah ban leit mushlia ïa ki kam ki jam jong ka sorkar Manipur halor ki mat kiba ïadei bad ka ‘Greater Mizoram’ lane halor ki mat kiba ïadei bad ka jingïawer ban wanrah ïa ka jingtylli hapdeng ki paidbynriew Mizo.
Kum ban shu ïathuh hangne, ka jylla Mizoram ka don ïa ka lynter khappud kaba jngai kumb a 95 km bad ka jylla Manipur; bad ki don ki thaiñ rilum jong ka jylla Manipur kiba la shong la sah da ki paid Zo – kiba dei ki paidbynriew kiba don ïa ka jingïadei kaba ïajan bha bad ki paid Mizo. Halor ka jingdawa jong ki MLA riewlum ban ïoh ïa la ka jong ka jylla, la ïathuh ba na ka liang ka Mizoram BJP unit ruh ka la pynpaw ïa ka jingai jingkyrshan kaba pura halor katei ka mat.
