Guwahati, Jymmang:
U Myntri Rangbah jong ka jylla Assam, u Himanta Biswa Sarma ha ka Lah Sngi U Blei mynta ka taiew u la pynbna ba ïa ka aiñ Armed Forces Special Powers Act (AFSPA) yn sa lah ban weng pyntreikam pura noh na ka jylla Assam hashwa ban kut une u snem ba mynta.
Haba ai jingkren ha ka jingïalang jong ki Armed Police Commandaant kaba la pynlong ha Police Training Centre, Gergaon na ka liang u Myntri Rangbah u la pyntip ba ka thong ba hakhmat eh jong ka Sorkar Jylla ka long ban weng noh ïa ka jingpyntreikam ïa ka AFSPA na ka jylla Assam hashwa ban kut u snem 2023.
Ha ka jingai jingkren jong u Myntri Rangbah u la pyntip shuh shuh ba na ka liang ka sorkar jylla ka la lah ban shim ïa ki sienjam kiba bha eh na ka bynta ban tehlakam ïa ka shong suk shong saiñ ha ka jylla khnang ban ïoh weng noh ïa ka AFSPA hashwa ban kut une u snem ba mynta. U la pyntip shuh shuh ba da ka jingsdang ban wanphai jong ka suk ka saiñ ha ka jylla Assam, ki battalion jong ka tnat pulit Assam kin sa mih bujli ha ka jaka jong ki bor pahara Central Armed Police Forces (CAPF) kiba la don bynta ban pahara ha ka jylla Assam kat kum ki kyndon jong ka aiñ.
U la pyntip shuh shuh ba na ka liang ka sorkar jylla kan sa shim ruh ïa ki lad ki lynti kiba kyrpang na ka bynta ban pynthymmai ïa ka seng pyrkhat jong ki bor pahara jong ki battalion bapher bapher – ban pynsgewthuh ba ki commandant bad ki bor pulit kiba dei na ki battalion bapher bapher ki dei shi bynta na ka tnat pulit jong ka jylla Assam.
U la pyntip shuh shuh ba ka sorkar jylla kan shim ïa ki sienjam kiba kyrpang ban pynkup bor shuh shuh ïa ki battalion jong ka tnat pulit ka jylla khnang ba kin lah hi ban pyndep ïa ki kamram kiba ïadei bad ka shong suk shong saiñ jong ka jylla. U Myntri Rangbah u la pyntip shuh shuh ba yn sa pynbiang ruh ïa ki lad jinghikai na ka bynta ki kam ban tehlakam ïa ki paidbhur khlem da pyndonkam ïa ki tiar pynmynsaw haba jia kino kino ki jingïakajia ne ki jingkulmar ha ka jylla
U la pyntip shuh shuh ba na ka bynta ban khmih bniah ïa ka jingdonkam jong ki ‘commandant’ bad ki pulit battalion bapher bapher jong ka jylla, ka sorkar kan ha man la ki 6 bnai kan pynlong ïa ka ‘Commandants’ Conference’.
