Shillong, Jymmang 23:
Sa shisien pat ki samla Khasi Jaiñtia bad Garo kim shym la paw kyrteng ha ka Civil Services Examination ba la pynlong da ka Union Public Service Commission (UPSC) ïa kaba ka ‘result’ la pynbna ha ka Sngi Ba-Ar.
Ka Civil Services Examination ka dei na ka bynta ban jied ïa ki ban long ki babu Indian Administrative Service (IAS), Indian Foreign Service (IFS), Indian Police Service (IPS) bad Central Services, Group A bad Group B.
Ha kane ka eksamin ki la don haduh 933 ngut ki samla kiba ka UPSC ka la ibit ban phah sha ka Sorkar Pdeng ban thung kam ïa ki. Na kine ki 933 ngut, 345 ngut ki dei ki General, 99 ngut ki dei ki EWS, 263 ki OBC, 154 ki Scheduled Caste bad 72 ngut ki dei ki Scheduled Tribe.
Na ka bynta ka IAS ki don haduh 180 tylli ki kam kiba lait, IFS 38 tylli, IPS 200 tylli, Central Services Group A 473 tylli bad Group B 131 tylli.
Kaba la wan nyngkong ha kane ka eksamin jong u snem 2022 ka dei ka Ishita Kishore 27 snem ka rta na Greater Noida ha Uttar Pradesh.
Haba la peit bniah ïa kane ka ‘result’ phim shym la lap wat tang iwei ruh i samla kynthei ne shynrang kiba dei ki Khasi Jaiñtia lane Garo. Hynrei na ka jylla Nagaland, Arunachal Pradesh, Assam, Mizoram, Sikkim, Manipur ki don ki trai ri trai muluk kiba la paw kyrteng ha kane ka ‘result’.
Kaba khatduh eh napdeng ki jaitbynriew Khasi Jaiñtia kaba la pyndep bad pass ïa ka Civil Services Examination ka dei ka Kong Isawanda Laloo ha u snem 2012. Ka Kong Isawanda ka long mynta kum ka Secretary ka sorkar jylla.
Ha u snem ba la lah, uwei u samla ba shong ba sah ha Jail Road, Shillong u Ankur Das u la wan ha ka kyrdan kaba 52 ha kane ka eksamin kaba long kawei na ki ba jwat tam ban ïakhun ha India.
