Shillong, Jymmang 23:
U Vice-Chairman ka kynhun kieng atiar, Hynñiewtrep National Liberation Council (HNLC), Bah Manbhalang Jyrwa ha ka Sngi Ba-ar u la ong ba wat la ka lynti jong ka jingïakren ïasuk bad ka Sorkar kan kham shim por hynrei ka seng ka don ka jingkyrmen ban poi sha ka thong.
“Ngi kwah ban pynshai sha ki paidbah ba ka jingwan jong ngi kam dei ban pyndem hynrei ngi kwah ban ïakren bad ka Sorkar India bad Sorkar Jylla bad ban pynbeit ïa kine ki kynrum-kynram kiba don,” la ong u Bah Jyrwa haba kren sha ki lad pathai khubor ha Umïam.
Haba pynpaw ka jingkyrmen ba ka jingïakren ïasuk kan poi sha ka thong, u la ong, “Ngi don ka jingangnud ba kane ka jingïakren lehse ka lah ban poi sha ka thong. Ka lah ban bam por tangba kan poi beit sha ka thong.”
Haba kylli halor ka jinglong-jingman jong ka jingïakren kumjuh ki mat kiba ka seng kan buh hakhmat ka Sorkar, u la ong ba yn ap shuwa haduh ban da sdang ka jingïakren ba pura (Formal Talks) ha u bnai Jylliew.
Ha kawei ka liang, u ksiang ka HNLC uba dei ruh u President ka Hynñiewtrep National Youth Front (HNYF), Bah Sadon K. Blah haba pynsngew halor ki jingïakren sdang (Informal Talks) kiba la ïaid baroh shi katta ba kynthup ïa ka jingïakren khatduh bad u Myntri ka tnad kam pohïing ka Jylla, Bah Prestone Tynsong, u la ong ba kine ki jingïakynduh ki long ban prat lynti shuwa ban poi sha ka jingïakren ba pura.
“Kaba ngi ïakren hi naduh mynshuwa ka dei na bynta ka lynti ïaid kaba shngaiñ khamtam ïa ki nongïalam jong ka seng ki ban ïashim bynta ha kane ka jingïakren ïasuk. Ngi la mynjur ruh ïa shibun ki bynta haba ïadei bad ka jingmap bad kaba ngin sa mynjur pura ynda la sdang ka jingïakren ka ban long ha u bnai ban wan,” u la ong.
Haba jubab halor ki mat jingdawa ka HNLC ha kane ka jingïakren ïasuk, u Bah Blah u la ong ba kane kan sa shai ynda la dep ïakren bad ka Sorkar.
Shuh shuh haba ïadei bad ka jingdawa pyntreikam ïa ka IOA&AA, u ksiang u la ong, “Ka HNLC ka la ïeng nongrim halor ka IOA naduh ba sdang namar ka IOA kam dei tang ka IOA naba ki bun pat ki bynta kiba bnoh lang ha ka bad ïa kine hap ban kynthup lang. Ka don ka bynta ha ka jingïakren ïasuk ba ngin ïakren halor ka IOA bad ngin sa pynsngew ha kata ka sngi ynda la dei.”
Haba kylli halor ka jingkhlaiñ jong ka seng, u Vice-Chairman u la ong, “Ngam tharai ba ka dei ka por ba ngin ïakren ïa kata. Kan sa poi…ynda la dei ka por phin sa ïohi mano ban don, kan sa shai kdar.”
Kane ka dei ruh ka sien banynkong ba ki dkhot ka HNLC kin ïakynduh ïa ki lad pathai khubor hadien ba la sdang ka jingïakren ïasuk.
