Shillong, Jymmang 23:
U MLA ka VPP na North Shillong, Bah Adelbert Nongrum, u ong ba ka NPP ka pyrkhat tang ïa ka seng lajong, hynrei kam pyrkhat ïa ka lawei jong ki khun samla jong ka jaidbynriew namar kam shym la sngap ïa ka jingdawa jong ka seng kaba la sdang mynta ka sngi da ka jingshah thngan u President ba rangbah u Bah Ardent Basaïawmoit hakhmat Secretariat.
U la ong ba ka jingwan ka jong u kum u MLA ka VPP ka long ban kyrshan ïa u Bah Ardent haba u la rai ban sdang ka jingshah thngan kaba khlem buh por ïa kane ka sorkar kaba sngap man-man ïa ka jingdawa ban pynkylla noh ïa ka bhah thung kam thung jam katkum ka jingbun paid.
Nangta u Bah Adelbert u la pynpaw ka jingïaroh ïa u President ka VPP u Bah Ardent uba la len lade ban mih shakhmat na ka bynta ka daw bah jong ka jaidbynriew, katba kiwei ki seng saiñpyrthei ki dang shu peitkai, hynrei kum ki nongkitkam ki la wan ban kyrshan ïa u mynta ka sngi.
Nalor kata, u la ong ba kane ka jingwan shong shah thngan hakhmat Secretariat ka dei namar ka sorkar ka leh sting ïa ka sur jong ki paidbah namar ka bhah thung kam ka la noh shiliang palat.
Shuh shuh u Bah Adelbert u ong ba ka jingïakhih ka seng kam mut ba ïakhun pyrshah ïa u Garo, hynrei ban ïakhun pyrshah ïa ka buit treikam jong kane ka sorkar kaba mynta.
Kum ban shu kdew u Bah Ardent u la wan ban shong shah thngan hakhmat Secretariat naduh ka por 10 baje mynstep ryngkat ki nongbud jong u bad suki-suki ki la don sa kiwei pat ki nongkitkam ka VPP, ki sengbhalang bad ki ’riew paidbah ki la wan shong shah thngan lang.
