Georgetown, Jymmang:
Ki bor pyniaid ka Guyana ki la iathuh ba kumba 20 ngut ki briew ki la khlad ha ka Sngi U Blei hadien ka jingpluh hapoh ka skul ‘Dormitory’ kaba don ha Guyana.
Kumta u President ka Guyana, u Irfaan Ali ha ka Sngi Nyngkong u la ong ba katei ka jingpluh ka long kaba jur bad ka la ktah jur ruh ia katei ka jaka bad ka long ruh kaei kaei ba ka Guyama kam ju kham ioh mad.
Ka jingkhlad jong kiba shah ktah na katei ka jingjia, ka la kiew sha ka 20 ngut hadien ba katto katne napdeng kiba la mynsaw ki la khlad noh hapdeng ka jingsumar. Katei ka jingpluh ka la jia hapoh ka skul Mahdia Secondary School kaba don ha ka phang pdeng jong ka Guyana.
Kumta, u Ali u la bthah ia ki tnat ba dei khmih ba kin leit ban pynbit pynbiang ia ki jingdonkam ha katei ka jaka bad kumjuh ruh ia kitei ki 2 tylli ki hospital kiba don ha ka shnong Georgetown ba ki dei ban ialeh shitom katba lah ban ai ka jingsumar kaba biang tam naka bynta kitei kiba mynsaw baroh.
Ha katei ka sngi, la phah ia ki liengsuiñ shimet bad kumjuh ruh ki liengsuiñ shipai sha Mahdia, kumba 200 kilometer na South jong ka Georgetown, naba katei ka thaiñ ka shah ktah jur bha ha u lap bah uba jur.
Ka Natasha Singh-Lewis, kaba long ka MP na ka liang pyrshah jong ka sorkar, ka la bthah ba dei ban phah tohkit bha halor ka daw jong katei ka jingkem ding katei ka skul.
Ka Guyana ka long ka ri kaba rit bha kaba don tang kumba 8,00,000 ngut ki paid nongshong shnong bad kaba baroh ki briew ki kren da ka ktien phareng.
