Shillong Jymmang 23:
Ka jingdon ki briew kiba ïoh ïa ka jingpang bampong ha ka bynta jong u pipe ba ïaid ki jingbam (esophageal cancer) ka la jyllei ha Meghalaya. Kiba bun kiba ïoh ïa kane ka jingpang ka dei beit kaba don jingïadei bad ka jingpyndonkam ïa ki jait duma (tobacco).
Tang ha North Eastern Indira Gandhi Regional Institute of Health and Medical Sciences (NEIGRIHMS), kiba ïoh ïa kane ka jingpang ha ka bynta jong u pipe ba ïaid ki jingbam, ka la shyrkhei bha, namar ki don hapdeng 1,000 ngut bad 1,200 ngut man u snem. Napdeng kine, kumba 700 ngut kiba ïoh pang ki dei na ka daw ki jait duma kiba ki pyndonkam.
Haba kren sha ki lad pathai khubor ha ka sngi ba-ar, kum shi bynta ban rakhe ïa ka sngi pyrshah ïa ki jait duma ha pyrthei (world tobacco day), u Dr Caleb Harris uba dei u Associate Professor bad Head of Department, Surgical Oncology ha NEIGRIHMS u la ong ba, “Ha Meghalaya, 70 na ka 100 kiba ïoh ïa ka jingpang bampong ka dei beit na ki jait duma kiba ki kyrni ban pyndonkam bad kaba kham kyllum ka dei ka jingpang bampong ha ka bynta u pipe ba ïaid ki jingbam (esophageal cancer),” la ong u Dr Caleb.
U Dr Caleb u la ong wat lada pyrshang ban ai ki jingsumar kiba bha na ki babha tam, hynrei ban ïoh ïa ka jingkoit kaba pura ym lah ban ai jingpyntikna.
U la ong ba kiwei pat ki jingpang namar u duma ki kynthup ïa ka jingpang ha u klongsnam, bad ki tor nalor kiwei kiwei kiba ktah ïa ki bynta ba shapoh jong ka met.
U la ong ba ka jingpang bampong ha u pipe ba ïaid ki jingbam ka kham kynrei ha ki shynrang kiba kyrni ïa u duma bad kiba kyrni ban dih kyiad bad kyrni ban bam kwai.
Haba kyntu ïa ki nongshong shnong shynrang bad kynthei ban kiar na ka jingkyrni ban pyndonkam ïa ki jait duma, u Dr Caleb u la ong ba ha Meghalaya, ki don 131 ngut kiba ïoh ïa kane ka jingpang na man ka 1 lak ngut ki briew.
La ïathuh ba ha Shillong Civil Hospital kaba la don ka jaka sumar la kajong ïa kiba pang bampong, ki don kiba ïoh pang bampong haduh 1,159 ngut naduh u Ïaïong 2022 haduh u Lber 2023.
La ong ruh ba naduh u Ïaïong 2022 haduh u Nailar 2022, kiba ïoh pang bampong ki long 314 ngut (esophagus), 338 ngut (head and neck), 44 (lungs) bad 38 ngut (cervix).
Kiwei pat ki doktor kiba kynthup ïa ka Dr Lana Lyngdoh Nongbri, ki la kubur ba ka don bha ka jingma ïa ka koit ka khiah na ki jait duma kiba ki briew ki kyrni ban pyndonkam.
Ka Dr Lana kaba dei ka State Nodal Officer ka National Tobacco Control Program, NHM, ka la ong ba ha Meghalaya ki don kumba 8000 ngut kiba ïap man u snem namar ki jingpang kiba don jingïadei bad ka jingpyndonkam ïa ki jait duma. Katba ha India baroh kawei, ki briew kiba ïap namar ki jingpang kiba ïadei bad ka jingpyndonkam ïa u duma ki long 13.5 lak ngut man u snem.
Ka Dr Lana ka la batai ruh shaphang ki lad ki lynti ban ïakhun pyrshah ïa ki jingpyndonkam ïa ki jait duma bad jingdie ïa ki jait duma ha ki jaka ki bym dei ban die, ka jingmana ban dih duma ha ki jaka paidbah nalor ka jingpynlong ïa ki jingpynshai paidbah ha kylleng naduh ki jaka pule bad ki shnong ki thaw.
Ka la ong ba mynta u snem ka phang pdeng ban rakhe ïa ka sngi pyrshah duma ha ka 31 tarik mynta u bnai ka dei “pyllait ïa ka Meghalaya na u duma (Tobacco-free Meghalaya).
La ïathuh ba ki don palat 7,300 tylli ki skul ha palat 3,500 tylli ki shnong kiba la pynlong ïa ki jingïaid paidbah da ki khynnah skul ban pyrshah ïa ka jingpyndonkam duma ha kaba la ïashimbynta da kumba 4.8 lak ngut ki khynnah.
U Bah I. Diengdoh, uba dei u DySP ka East Khasi Hills u la batai shaphang ki kyndon aiñ kiba mana pyrshah ban dih duma ha ki jaka paidbah bad ban die ïa ki jait duma kumjuh ruh ka aiñ COTPA kaba la treikam naduh u snem 2003.
Haba khot ïa ka jingïatreilang jong baroh ban poi sha ka thong ha ka jingïakhun pyrshah ïa ki jait duma kiba pynmih ha ka ri, une u pulit ophisar u la ïathuh ba ka tnat pulit kaba pyntreikam ïa ki kyndon ïa kiba leh pyrshah bad kiba pynkheiñ aiñ, ka la ïoh lum ïa ka kuna kaba kot sha ka T.6,17,930 tang ha East Khasi Hills district naduh u snem 2022 haduh u Ïaïong, 2023.
U la ong ba Cantonment Beat House ka dei kaba kham lah bha ban pyrkhing ha kaba ka la ïoh lum ïa ka kuna T. 2,40,600.
Ha West Jaiñtia Hills district, ka kuna kaba ïoh lum na ki briew kiba pynkheiñ aiñ ka long T.28,520 bad ha West Khasi Hills district, la ïoh lum T.5550
Kumta u Bah Diengdoh u la ong ba ka tnat pulit ka ju ïatreilang bad donbynta ban pynsngewthuh ïa ka imlang sahlang bad u la banjur ba da ka jingdonbynta bad kitkhlieh lang jong baroh ki nongshong shnong, yn sa lah ban pynduh ïa u duma ha Meghalaya.
Ka Kong Jenifer Synrem na ka tnat pule puthi ka Jylla ka la kren shaphang ka jingdon bynta ka tnat pule puthi ha ryngkat bad ka tnat ka koit ka khiah ban pyntreikam ïa ki sienjam ban ïakhun pyrshah ïa u duma.
U Dr Star Pala, Associate Professor Department of Community Medicine, NEIGRIHMS, u la ong ba ki kmie ki kpa ki donkam ban shimkhia ban khang ïa ki khun ban bam ïa ki jingbam kiba song plastik kiba ktah ïa ka koit ka khiah jong ki khynnah bad lah ban thaw bun jait ki jingpang ha ka met.
U la ong ba ki khyllung bad khynnah ki donkam ban bam ïa ki jingbam kiba tei bad kiba khuid ym ki jingbam ba song plastik.
