Shillong, Jymmang 23:
Ka jingjia kaba la jia ban ingkhong khait ka ïing skul jong ka KJP Girls’ Synod Higher Secondary School, Jaïaw ha kane ka nongbah ka la buh ïa kiba bun ha ka lyngngoh.
Ka jingpluh ka la jia ha ka step synñia jong ka Sngi U Blei ka 21 tarik Jymmang hadien ka 2 baje ha ka kynta ba dang treikam ka jingpynlip ding ilektrik (load shedding).
La ïathuh ba ki pulit ki dang pynlong ka jingtohkit ban lap ïa ka daw tynrai kumno kane ka jia.
Ka jingkylli ka mih hadien kane ka jingjia ha ki babun balang ban pyrkhat ba lehse ka dei na ka daw ka jingthut ka ding ilektrik ba sa jia ka jingpluh ka la dei lypa shabar namar ha katei ka por ka ding ilektrik ka la lip soit.
Hato don kano kano ka jingleh dusmon da mano-re-mano? Ym lah ban ong ïa kane tat haduh ban da pyndep ïa ka jingtohkit.
Kane ka ïing skul ka dei kawei na ki ïing barim tam ha Shillong kaba la tei hadien ba la seng ïa ka skul ha u snem 1892.
Ka dei ka ïing dieng kaba la rim bha bad ka ïing sahkynmaw kaba la ai jingshakri ban sam ïa ka jingnang jingstad sha kiba bun naduh ka por jong ka Sorkar Phareng lyngba ka Welsh Mission.
Ka long ka jingbynnud ba ka ïing kaba rim bad kaba la shna pynwandur itynnad bha kan kylla dpei. Kumta ki briew ka aiñ lyngba ka tnat pulit ki hap ban wad ïa ka daw tynrai kumno kane ka ïing skul ka ing, bad hato don ba wiang ding ïa ka? Lada ka dei don ba leit wiang ding, kita kiba leh ki mut ban dusmon ïano?
Namar kata, da ka jingduh noh ïa katei ka ïing skul ki khynnah skul ki la duh ruh ïa ki kamra klas. Kane ka la buh jingeh ïa ki bor pynïaid jong ka skul ban pynlong skul bad ka long ka jingduh kaba khraw ïa ki khynnah skul kiba pule ha kane ka skul.
