Shillong, Jymmang 23:
U Vice-Chairman ka kynhun kieng atiar, ka Hynñiewtrep National Liberation Council (HNLC), Bah Manbhalang Jyrwa u la ong ba ka bynta ba ïadei bad ka jingmap ka dei ka mat kaba hakhmat eh ha ka jingïakren ïasuk jong ka seng bad ka Sorkar.
“Ka jingmap kan dei kaba hakhmat duh. Lada kam don ka jingmap te kumno ngin ïoh ka jinglaitluid ban ïakren bad ka Sorkar. Mynta ngi ïoh ïa kata ka ‘Safe Passage’, kane ruh ka dei kawei na ki bynta,” la ong u Bah Jyrwa haba jubab halor ka jingpyndam ïa ki mukotduma pyrshah ïa ki dkhot ka seng.
Halor ka jingshah khot hajir ki nongïalam ka seng ha ka National Investigation Agency (NIA), u la ïathuh ba ha ka jingïalang ba dang shen bad u Myntri ka tnad kam pohïing ka Jylla, Bah Prestone Tynsong, ka seng ka la ïakren halor katei ka bynta.
“Na ka liang ka Sorkar Kmie bad Sorkar Jylla hi, ki la ong ba kan ym don kano-kano ka jingpynthut,” u la ong.
Ha kawei ka liang, u la ong, “Ki nongïalam ka seng ki dang don hi ka jingkhuslai jingmut, lehse ka lah ban poi ka por ba ynda ngi la wan lut shane, lehse ki lah ban kem namar ka NIA kumba ong ka dei ka ‘Quasi-Judicial Body’. Te ka don hi ka jingkulmar jingmut khyndiat hynrei lada kam don kata te naduh mynshem snem lehse, ki nongïalam jong ngi ki la wan shane.”
Haba kylli halor ka jingïakynduh bad u Myntri ka tnad kam pohïing, u Bah Jyrwa u la ong ba ka jingkular na ka liang jong u ka long ba ynda la sdang ka jingïakren, yn sa buh hakhmat ïa kitei ki mat jingdawa.
Haba bynrap ïa katei ka bynta, u ksiang ka HNLC, Bah Sadon K. Blah u la ong, “Wei ba ka Sorkar ka la mynjur ïa ka jingmap ha ka jingïakren ïasuk, kan ym don jingthut shuh.”
Halor ka jingsangeh ïasiat ba shipor (Cease Fire), u Bah Blah u la ong ba kane ka lah ban urlong ynda la dep shuwa ka kylla banyngkong jong ka jingïakren ïasuk.
“Lehse ngin sa lah ban pynskhem noh syndon ïa kata ka ‘Cease Fire’. Kan shong pat ha ka kylla banyngkong jong ka jingïakren, kiei ba ngin ïakren-ïathir bad lada ka la ïahap ka bynta ban soi noh, te ngin ïasoi noh, lehse da ki dang don pat ki bynta ba bniah kiba ngim pat lah ha ka kylla banyngkong lehse kan dang shim por,” u la ong.
Shuh shuh haba kdew ba ka jingthmu jong ka jingïakren ïasuk ka dei ka ‘Settlement Agreement’, u Bah Blah u la bynrap, “Lada ngi ïakren ïa ka jingdawa ka seng naduh mynshuwa, ka mut ynda ngi la soi ïa ka ‘Cease Fire’, ynda ngi la sngewthuh ïa ka jinglong-jingman ha ka kylla banyngkong, ka jingthmu hi ka dei sha ka ‘Settlement Agreement’. Ngi hap ïasoi ïa kane. Kane ka long shi bynta jong ka jingïakren ïasuk.”
Nalor u Bah Jyrwa bad u ksiang jong ka seng, ha kane ka sngi la ïadonlang ruh u Political Secretary ka seng, Bah Aristarwell Thongni, u dkhot ka seng, Bah Raymond Lapang bad PSO, Bah Storgy Lyngdoh.
