Gangtok, Jymmang:
Ha ki khyndiat sngi kiba la leit noh la ïoh jingtip ba na ka daw jong ka jingther u slap u ba jur ha ka thaiñ North Sikkim ka la wanrah ïa ki jingjia twa khyndew kiba shyrkhei ha ka thaiñ Chungthang, Mangan district kiba la wanrah ruh ïa ki jingshah pynjulor jong ki surok ki syngkien (kynthup ka surok bah) kiba don ha katei ka thaiñ.
Na kitei ki jingjia twa khyndew la ïoh jingtip ruh ba ki la don haduh kumba 500 ngut ki nongjngoh kai pyrthei kiba thmu ban leit jngoh ïa ka them Lachung bad Lachen kiba la sahkut ha Chungthang.
Halor katei ka jingjia, la ïathuh ba hadien ba ka jingïoh ïa ki jingkyrpad na ki bor pynïaid distrik, ki shipai Trishakti Corps jong ka tnat Indian Army ki la leit mar mar sha katei ka shnong ban leit pyllait ïa baroh ki nongjngoh kai pyrthei kiba la sahkut ha shiteng lynt.
Ki nongjngoh kai pyrthei kiba la sahkut ha ka shnong Chungthang ki kynthup ïa 216 ki riew shynrang, 113 ngut ki ‘riew kynthei bad 54 ngut ki khynnah rit – ïa kiba la leit ban ïalam noh sha ki shlem trei kam bapher bapher jong ka tnat shipai bad la pynbiang ruh ïa ka bam ka dih, ki dawai dashin bad ki jaiñphong jaiñkup kiba syaid.
Kat kum ka kyrwoh ba la pyllait da ka tnat shipai la ïathuh ba ki kynhun nongsumar kynthup ki medical officer na kawei ka hospital kaba marjan ki la wan ban jngoh ïa kitei ki nongleit jngoh kai pyrthei ban pynbiang ïa ki lad jingsumar kiba paka na ka bynta ki katto katne ngut kiba la ïoh ïa ka Acute Mountain Sickness (AMS).
