Nongstoiñ, Jymmang 23:
Ha ka Sngi Ba-ar, ka Voice of the People Party (VPP) Nongstoiñ konstitwensi ka la leit ban rah ‘placard’ hakhmat ïingsah u MLA ka Nongstoiñ, Bah Gabriel Wahlang kaba ha ka shnong Pyndengrei, West Khasi Hills.
La ong ba katei ka jingleit rah ‘placard’ jong ki dkhot ka VPP hakhmat ïingsah utei u MLA ka long kum ka dak ban pyni ka jingpyrshah halor ka jingbym kren eiei jong u halor ka ‘Reservation Policy’.
Haba kren sha ki lad pathai khubor, u samla Davis Franky Wahlang, Joint Secretary ka VPP Nongstoiñ u la ong ba katei ka jingleit rah ‘placard’ hakhmat ïingsah u MLA ka long kum shi bynta ban pynbor ïa u ba un kren lem ha ïingdorbar thaw aiñ ka Jylla khamtam ha kaba ïadei bad katei ka mat kaba ktah ïa ki khun samla.
“Ka dei tang ka jingsdang bad lehse ha ki sngi ban wan kan nang jur tat haduh ba ka Sorkar kan da sngap ïa ka jingkyrpad jong ki paidbah ha kaba ïadei bad katei ka jingdawa.
Ha kawei pat ka khubor, ki paidbah nongshong shnong jong ka Mawthadraishan ha ka 23 tarik mynta u bnai ki la ïa mih paidbah ban leit ai da ka shithi sha ka ïingsah jong u MLA ka Mawthadraishan, u Bah Shakliar Warjri kaba don ha ka shnong Kynshi Mawria, Eastern West Khasi Hills District ban dawa ba u dei ban kren eiei halor ka ‘Reservation Policy’.
Shuh shuh katkum katei ka shithi ba la aiti sha u MLA, la pynpaw ba ki paidbah nongshong shnong jong ka Mawthadraishan konstitwensi ki la kwah noh ban pynbeit ïa ka ‘Reservation Policy’ namar kane ka la ktah ïa ki samla ha ka liang ka ïoh kam ïoh jam.
Kitei ki paidbah ki la kyntu ruh ba u MLA jong ki un kren ïa kane ka mat sha ka Sorkar ban pynbeit noh ïa ka bhah thung kam kumba la buh ha ka mat ïakhun ilekshon (Manifesto) jong u bad ka HSPDP.
