Shillong, Jymmang 23:
U Swapnil Bhattacharyya, uba na Shillong, u la lah ban ‘pass’ ïa ka Civil Services Examinations (CSE) 2022 ba la pynlong da ka Union Public Service Commission (UPSC) kaba ïa ka ‘result’ la pynbna ha ka Sngi Ba-Ar.
U Swapnil u la wan ha ka kyrdan kaba 344 napdeng ki 933 ngut ki samla kiba la ‘pass’ ïa kane ka eksamin ban jied ba kin long kum ki babu Indian Administrative Service (IAS), Indian Foreign Service (IFS), Indian Police Service (IPS) bad Central Services, Group A bad Group B.
U Swapnil u la pyndep ïa ki jingpule Class 10 na St Edmund’s School bad nangta ïa ka Class 12 na Army Public School (APS) ha Shillong bad ïa ka ‘Graduation’ ha ka Physics na Kirori Mal College ha New Delhi.
Na ka liang U Myntri Rangbah ka jylla u Conrad K Sangma u la ai khublei ïa une u samla uba la lah ban pyndep ïa kane ka eksamin kaba long kawei na kiba eh tam ha India.
