Jowai, Jymmang 23:
Ka jingïakynduh lang ban wanrah noh ïa ka jingïasngewthuh jingmut hapdeng ki Karbi bad ki Pnar ha ka thaiñ Khanduli, kaba la neh shi bnai tam, ka la pulom noh namar ka jingbym shai halor ka jinglong jingman jong ka Entry Tax Gate, ba la buh da ka Karbi Anglong Autonomous Council ha Khanduli kaba long ka dawbah dawsan jong ka jingïakynad hapdeng ki Karbi bad ki Pnar mynta ka kynti.
Ïa kane ka jingïakynduh lang hapdeng ki Karbi bad ki Pnar la pynlong ha ka Sngi Ba-ar ha BOP jong ka Assam kaba don ha Khanduli, West Jaiñtia Hills District.
La pynlong ïa kane ka jingïakynduh lang ha ka jingsynran jong u Assistant Commissioner bad Border Magistrate u Bah W.K. Kharbuli, u BDO ka Namdong C&RD Block u Bah B. Sungoh, bad DSP A.J. Sangma na ka liang ka West Jaiñtia Hills District. Katba na ka liang ka West Karbi Anglong District la wan mih khmat da u Assistant Commissioner bad Border Magistrate u Rakesh Thakur bad u Circle Inspector ka Baithanglangso Circle u Z R Khan.
Ki nongïalam kiba la mihkhmat na ka liang jong ki Pnar ki kynthup ïa u Waheh Shnong Khanduli u Bah Yooshida Nongspung, u MDC ka Barato-Mukroh u Bah Aiborlang Shadap, u Waheh Shnong ka Lapangap u Bah Deibormi Langdoh, u ‘riew pawkhmat ka thaiñ kum u Bah Pyrkhat Pyrphet lem bad 6 ngut kiwei.
Katba na ka liang ki Karbi la wan mih khmat da u President ka Border Peace Development Community Sochen u Augustine Hanse, Adivser u Anthony A. Teron, u Secretary u Paul Kroo lem bad 7 ngut kiwei.
Hadien ka jingïathir jingmut kaba la neh palat shi kynta ka jingïalang ka la shim ïa ka rai ban pynneh pynsah ïa ka jinglong jingman kumba long mynta ne ka ‘status quo’ katba ym pat lah ban pynbeit ïa ka issue kaba ïadei bad ka Entry Tax Gate.
Kane ka ‘status quo’ ka kdew ba ki Pnar kim pat bit ban leit sha West Karbi Anglong District bad ki Karbi kim pat long ban wan sha West Jaiñtia Hills District kumba ka long mynta bad kaba la neh la palat shi bnai.
Haba kren bad ki lad pathai khubor u Bah Pyrkhat Pyrphet u la ong ba ynda ki la ïoh ïa ka shithi na ka KAAC kaba kdew shai ba ïa ka Entry Tax Gate ha Khanduli la weng bad pyndam noh shirta, kin sa pynlong ïa ka jingïakynduh lang biang bad ki Karbi.
U la bynrap ba kin sa ïakynduh ïa ki bor ka Jaiñtia Hills Autonomous District Council (JHADC) ban dawa ïa ki ban ïakren lem bad ka KAAC ban weng ïa katei ka khyrdop khrong khajna.
Kum ban shu pynkynmaw, ha ka 15 tarik Ïaïong, ka Karbi Anglong Autonomous Council (KAAC) ka la sieh jubor ïa ka jingthoh (signboard) hapoh u pud u sam jong ka Dorbar Shnong Khanduli na bynta ban khrong khajna ïa ki kali kit mar rep jong ki nongshong shnong ka Khanduli.
Ki nongshong shnong kiba la bitar ïa kane ka jingleh bor jong ka KAAC ki la leit pynpra ïa katei ka ‘signboard’ ha ka 17 tarik u Ïaïong bad ka la mih ruh ka jingïapyni bor bad ka thma ktien kaba jur hapdeng ki nongshong shnong ka Assam bad ki nongshong shnong ka Meghalaya.
Ha ka 11 tarik Jymmang ki paidbhur jong ka jaitbynriew Karbi ki la hiar thma ïa ka kali jong u SP ka West Jaiñtia Hills District u Bah Chemphang Syrti hadien ba uwei u Karbi u la mynsaw.
