New Delhi, Jymmang :
Ka kynhun ialehkai Hockey jong ki shynrang ka ri ha ka kyrdan Junior ka lah pynkhreh bha mynta ialade na ka bynta ban pynurlong ia ka jingangnud kaba baroh shi katta ban ioh shim bynta ha ka lympung ialehkai mynta u snem ka ban sa long ha Salalah ka Men’s Junior Asia Cup 2023; kaba lah plie pyrda naduh ka 23 tarik mynta u bnai; katba ka jingiakhun phainal jong ka lympung yn pynialehkai ha 1 tarik jong u bnai ban wan.
Ka khubor ka iathuh ruh ba katei ka lympung ialehkai ym tang ba kan ai ka jingshakri kaba biang tam eh na ka bynta ki nongialehkai na ka dewbah Asia ba dang khynnah ha ka rynsan iakhun ba kin pyni ia ka sap ialehkai ba tbit ka jong ki, hynrei kan long ruh ka jingiakhun kaba kham tyngeh. Ki kynhun kiba wan ha ki lai kyrdan ba shakhmat ha katei ka lympung ialehkai kin shah jied ruh na ka bynta ban mih madan ha ka FIH Junior Hockey Men’s World Cup 2023 ia kaba lah dep ban pynkhreh na ka bynta ban pynialehkai ha Malaysia ha u bnai Nohprah mynta u snem.
Kumta ia katei ka kynhun ialehkai ka ri yn sa ialam nakhmat da u Uttam Singh kum u kapten ka kynhun bad u symbud jong u da u Boby Singh Dhami ha kaba ka kynhun kan rung sha ka lympung kum kaba dang iai bat ia ka nam lahduh.
Ka khubor ka iathuh ruh ba ha katei ka lympung ialehkai yn sa sakhi ruh ia ka jingshimbynta jong ki 10 tylli ki kynhun ialehkai kiba lah shah phiah sha ki 2 tylli ki Pool bad ka kynhun ialehkai ka ri ka lah shah pynngat ha ka Pool A ha ka jingiadonlang bad ka kynhun ialehkai na Pakistan, Japan, Thailand bad Chinese Taipei. Katba ha ka pool B la kynthup ia ka kynhun ialehkai kaba na Oman, Korea, Malaysia, Bangladesh bad Uzbekistan.
Katkum ka rukom pynbeit na ka bynta ki jing-ialehkai ha ka lympung ka long ba man la kawei pa kawei ka kynhun ialehkai ha ki jingiakhun ha ka Pool, kin ialehkai ia kiwei pat ki saw kynhun ialehkai na ka Pool jong ki kata ruh tang mar shisien bad ki ar kynhun ki ban wan shakhmat na ki ar Pool kin shah jied na ka bynta ka jingiakhun semifinal.
Ia ki ar kynhun iakhun phainal bad ki kynhun ki ban iaknieh ia ka takma Rnong ia kaba yn sa rai da ka jingialehkai hapdeng ka kynhun shah rem ha ka Semi-Final, yn sa shah jied na ka bynta katei ka lympung ialehkai ka ban sa long pat hadien.
Ha ka jingsdang ka jingiaid lynti ha katei ka lympung, katei ka kynhun ialehkai ka ri kan sdang ia ka jingiaid lynti da kaba iakhun nyngkongeh bad ka Chinese Taipei mynta ka sngi (24 tarik) katba ha ka 25 tarik pat kan iakynduh sa bad ka Japan, bud sa ka jingiakhun bad ka Pakistan ha ka 27 tarik mynta u bnai ha shuwa ba kan iakhun pyrshah ia ka Thailand ha ka jingia aireng ba khatduh na ka Pool kata ha ka 28 tarik.
