Hiroshima, Jymmang:
Katkum ki khubor ba la mih hashwa ka jingialang ‘G7’ lane ka ‘Group of Seven’ kaba la long ha Japan ha ka Sngi Thohdieng, la ong ba ka United States ka la pyn-ap sa da ki kyndon ba thymmai ba yn pynngat ia ka Russia bad ia kito ki heh ka Russia halor ka jingleit hiar thma ba khlem kut trai jong ka Russia pyrshah ia ka Ukraine tad haduh kine ki sngi ba mynta.
Kumta ha katei ka sngi, la ong ba kitei ki nongialam jong ki 7 tylli ki ri, ki la leit ban iakynduh lang bad ban shong jingialang hapoh Hiroshima bad ban iakren ruh halor ka jingshah thombor jong ka Ukraine ha ka Russia ha une u snem uba ar. Namarkata ruh la ong ba ka United States ka la thmu ban pynngat kyndon noh pyrshah ia kito ki kompeni, ki bank bad ki heh nongkhaïi jong ka Russia kiba ju iadei kam bad ka United States baroh shi katta namar ka jingleh bym suit ñiew jong ka Russia ia ka jing kyntu jong kiba bun ba kan sangeh noh ia katei ka thma.
Haba iakren bad ki lad pathai khubor ha ka Sngi Palei shuwa ban leit sha katei ka jingialang G7, ki heh ka US ki la ong ba ka jingthmu jong kane ka jing pynngat kyndon ha kane ka por, ka long ban pynsajia ia ka Russia haba iadei bad ka jingleh shitom jongka ban ioh ia ki tiar iakhun bad ki jingdonkam bapher hapoh madan thma.
Kumta la ong ba ka United States ryngkat bad ki paralok jongka, kynthup ia ka European Union bad ka Britain, tad haduh kine ki sngi ki dang ialeh ban nang pynjur bad pynbun ia ki jingpynngat kyndon pyrshah ia ki heh bad ki kompeni bapher jong ka Russia bad kane ka jingpynngat kyndon jongki ka la sdang naduh u Rymphang hi jong u snem 2022 ha kaba ka Russia ka dang sdang ban leit hiar thma ia ka Ukraine ha katei ka por.
Haba iadei bad kane, la ong ba ka United States ka la pynbna ia 300 tylli ki jing pynngat kyndon thymmai ia ki heh shimet, ki nongkhaïi, ki kompeni bad kiwei kiwei de kiba dei ki jong ka Russia, kum shi bynta ban pynsah marwei ia ka Russia namar ka jingleh donbor jongka ha ka thma ha Ukraine.
