Kuala Lumpur, Jymmang:
Ki nongialehkai Badminton ba kham pawkhmat ka ri India napdeng ki kynthei kata ka Malvika Bansod bad Ashmita Chaliha, ki lah jam mynta sha ka rynsan iakhun kaba hajrong jong katei ka Malaysia Masters Super 500 tournament na ka kyrdan iakhun paramarwei, hadien ba kitei ki nongialehkai ki la lah ban khur ia ka jingjop shalade ha ka kylla jied nongialehkai jong ka lympung.
Kumta ha kaba iadei bad katei ka bynta, ka Malvika ka la lah ban ialehkai bha naduh kaba sdang tad haduh ba kan da lah ban pynliem noh ia ka nongiakhun pyrshah na Chinese Taipei ka Lin Hsiang da Ti 21-12 21-19. Shuh shuh ruh ka Ashmita ka la lah ban pynliem noh ia ka nongialehkai na Canada ka Wen Yu Zhang da 10-21 21-19 21-17.
Hadien katei ka jingjop ba nyngkong, ka Malvika kan ioh ban iakynduh pat sa bad ka Wang Zhi Yi, katba ka Ashmita pat bad ka nongialehkai na China ka Han Yue ha kata ka rynsan ia aireng ba ki lah ioh ban kiew jong ka lympung.
Na ka jingiakhun jong ki shynrang, u S. Sankar Muthusamy Subramanian u lah mad noh ia ka jingshah pynrem ka jong u da 10-21 14-21 ha u rangiakhun pyrshah na Taipei u Chi Yu Jen.
Kumjuh ruh ka lah jia ia u Mithun Manjunath, u bym shym la lah ban khur ia ka kabu ksiar shalade hadien ka jingshah pynrem noh da 13-21 19-21 ha u nongialehkai na Taipei u Chia Hao Lee. Kiwei pat ki khlur ialehkai ka ri ki ban sdang ia ka jingiaid lynti mynta ka sngi (Balang) ha ka lympung ki long ka PV Sindhu, HS Prannoy, HS Prannoy, Kidambi Srikanth bad Lakshya Sen.
