Shillong, Jymmang 23:
Ka Shillong Lajong FC ka la pynpaw ïa ka jingsngewkmen na ka bynta ban ïoh wanphai biang sha ka lympung I-League hadien saw snem ba shah pynhiar kyrdan na kane ka lympung.
Kane ka jingurlong ka la wan hadien ba ka lah ban pynliem ïa ka Bengaluru United FC da 2-1 kol ha ka jingïalehkai kaba khatduh jong ka wat kaba khatduh jong ka Second Division League. Ka Lajong ha kane ka jingïaknieh rung sha kane ka lympung ka la kamai 7 dor-thong na ka bynta ban long kum ka kynhun kaba nyngkong ban ïoh rung sha katei ka lympung.
Kham hashwa kane ka kynhun ïalehkai na nongbah hapoh ka jingïalam u Bah Bobby L. Nongbet, ka la pynliem ïa ka United da 2-1 kol, ka la ïakhaid khlem don ba thep kol pyrshah ïa ka Delhi FC hashwa ba kan shah rem ha ka Ambernath United da 5-1 kol.
Kiwei pat ar tylli ki kynhun ki ban ïaknieh rung ki long ka Delhi FC bad ka Ambernath United ha kaba kin pynkhreh ban ïakhun pyrshah ha ka jingïalehkai ba khatduh ha ka 26 tarik mynta u bnai.
Ha lyndet jong kane ka jingjop u, Coach Bah Bobby Nongbet bad ki Staff jong kane ka kynhun ki la long ka daw ba kongsan tam, namar kham bun na kine ki khynnah ki dei kiba ma u hi u la pynshitom bun tylli ki snem ban ïoh kheit ïa u soh bathiang. Ki rangïalehkai la ki dang lung ha ka bor pyrkhat, pynban hapoh ka jingïalam u Bah Bobby ryngkat ki Coach nongïarap kum ki Asst. Coach Bah Lekini Suting bad Bah Milan Nongkhlaw, Bah Seibor Sana Youth Head coach bad kiwei ki nongïarap jong ka klob kiba la trei shitom na ka bynta kane ka jingjop.
Ka mynsiem ba rangbah jong ki khynnah ka la ïai neh wat hapdeng ki jingeh kiba bun ha kane ka lynti ïaid jong ki.
Ka jingïadon bynta bad kylluid mynsiem jong ki bor pynïaid ka Shillong Sports Association ba wat hapdeng ka por ba ka jingpynkhreh ïa ka madan ka dang long ha lynti pynban kim shym la pynmih kano kano kaba pyrshah ban ïoh ban ïalehkai ïa baroh ar tylli ki jingïakhun ha la ïing ha kane ka wat kaba khatduh. “Ngi da sngewnguh eh ïa phi baroh kum ki dkhot kiba ngim don kyntien ban pynpaw, hynrei ngi kyrpad ba U Blei un da kyrkhu ïa phi ba phin nang long jingkyrkhu wat ïa ki pateng ki ban dang wan,” la ong ka kyrwoh jong ka SLFC.
Kane ka klob ka la pynpaw ka jingai khublei kyrpang ruh ïa ka tnat ïalehkai lyngba u Myntri ka tnat ïalehkai u Bah Shakliar Warjri ba la shah ban pynlong ïa kane ka jingïalehkai wat hapdeng ba ka jingmaramot ïa ka madan ïalehkai ka dang ïaid shaid shaid.
Shuh shuh kane ka klob ka la ai khublei kyrpang ruh ïa u Myntri Rangbah u Conrad K. Sangma bad u Myntri barim ba dei khmih ïa ka tnat ïalehkai Bah Banteidor Lyngdoh kiba long ka daw bah ban ïoh ïa kane ka madan ïalehkai kaba biang nadong shadong.
Nalorkata, ka klob ka la ai khublei ruh ïa ka Meghalaya Football Association (MFA) kaba ka la shah ïa ka klob ban don ïa ka ‘second stage match’ bad ruh ban ïoh ïa ka madan ban kilanmet.
Ha kaba kut kane ka klob kam shym la klet ïa ki paidbah nongkyrshan kiba la wan ban ai mynsiem ïa ki rangïalehkai khamtam ha ki jingïalehkai ha la ïing kat haduh ba ka lah ban kynjoh sha ka thong.
