Shillong, Jymmang 23:
U President ka Voice of the People Party (VPP), Bah Ardent M. Basaïawmoit, u la wan poi hakhmat Secretariat naduh ka por 10.00 duna mynstep ha ka 23 tarik Jymmang 2023 ban shong shah thngan khlem buh por kum shi bynta ban dawa na ka sorkar ban pynkylla ïa ka bhah thung kam thung jam ne ka Reservation Policy.
Kane ka jingshong shah thngan ka dei hadien ba u la pynbna ha ka jingïalum paidbah hakhmat Additional Secretariat myn ha ka 19 tarik Jymmang 2023 namar ka jingbym treh ïakren ka sorkar ïa ka bhah thung kam thung jam ha ka jingïalang jong baroh ki seng saiñ pyrthei ha Secretariat.
Ha kane ka sngi la ïohi ïa ki nongkitkam ka VPP kiba la wan synran lang ïa u Bah Ardent hakhmat Secretariat.
Haba ïakren bad u Bah Ardent u la ong ba kane ka jingshong shah thngan ka dei ba ka seng kam hun ïa ka jingïalang ki seng saiñ pyrthei ba la khot da ka sorkar jylla mynshem taïew namar haba ka seng ka dawa ban ïakren ïa ka bhah thung kam ki wanrah ïa ka jingïakren halor ka Roster System kaba long tang ka jingpynthame.
“Kumba nga la rai ban sdang ka jingshah thngan nyngkong ma nga kum u President ngan sdang naduh mynta ka sngi ryngkat ka jingsynran lang ki nongkitkam ka VPP” u la ong.
Nangta, u la ong ruh ba ka seng VPP kam shym la byrngem tang da ka ktien, hynrei kan leh syndon da ka kam da kaba shah thngan kum ka jingdawa na ka sorkar ban pynthymmai noh ïa ka bhah thung kam thung jam.
“Ngim donkam ban batai bniah katno dei ban ai bhah kham bun sha ki samla Khasi, hynrei ki Myntri Sorkar kiba shong ha shuki ki la dei ban sngewthuh namar ngi dawa ban pynkylla ïa ka bhah thung kam katkum ka jingbun briew” u la ong.
Nalor kata, u la ong wat la kiwei ki seng saiñ pyrthei ki kynthoh, hynrei ka seng VPP kan ïakhih beit lada don kino kino ki mat kiba ktah ïa ka jaidbynriew.
Ha kajuh ka por u la ong ba kane ka jingïakhih kan nym pynmong ïa kiwei ki jaidbynriew, hynrei ka shong beit ha ka jingstad ka sorkar namar ki Khasi ki la kham bun briew hapoh ka jylla.
Kumta namar ka jingther noh u slap ha ka por 1:00 baje nohphai sngi kaba la pynlong ban tuid um ha jaka ba shong shah thngan u Bah Ardent hakhmat Secretariat, ki nongïalam ka VPP ki la phah shna noh da ka rynsan kaba kham skhem hajan jaka ïeng kali hajan Additional Secretariat ban lait na ka jingther u slap bad na ka jingtuid ka um, bad ka lyer.
Ka jingshna ïa kane ka jaka shong shah tngan u Bah Ardent ka la sdang naduh 3:00 baje nohphai sngi kaba dang bteng haduh 10 baje mynmiet. Katba ha ka por 10:30 mynmiet u Bah Ardent ryngkat kiba wan synranlang ïa u ki la mih noh nakhmat Secretariat ban leit shong ha jaka ïeng kali hajan Additional Secretariat ban long shngaiñ ïa ki paidbah haba ki wan sngewlem namar ka jaka ka kham kylluid.
