Imphal, Jymmang:
Ki bor shipai na ka tnat Indian Army bad Assam Rifles ha ka jingleit khynra kaba ki la pynlong ha ka Lah Sngi U Blei mynta ka taiew ki la ïoh ban kem ïa uwei u runar na ka thaiñ Imphal East district na ka daw jong ka jingdonkti ban pynmih ïa ki jingkulmar ha ka jylla Manipur.
U runar u ba la shah kem ha katei ka sngi u dei u ba la tip kyrteng kum u Chungkhomang Kipgen – u nongshong shnong ka thaiñ New Keithelmanbi, Imphal West district. Na utei u runar, ki bor pahara ki la ïoh ruh ban kurup ïa kawei ka suloi 12 bore shot gun bad 7 tylli ki ‘cartridge’.
Kat kum ka jingïathuh jong ki bor pahara, ki la pyntip ba utei u Kipgen u dei u runar u ba la don bynta ha ka jingïasiat kaba la jia ha ka shnong Moidangpok kaba la wanrah ruh ïa ka jingmynsaw jong 3 ngut ki nongshong shnong ka thaiñ. Hadien ka jingshah kem, ïa u Kipgen la leit ban aiti noh sha ki bor pulit jong ka jylla Manipur na ka bynta ban pynlong ïa ki jingtohkit kiba dang sah.
Sa ha kawei pat ka jingjia la ïathuh ba hadien ba ki bor pahara ki la ïoh jingtip shaphang ka jingdon jong 4 ngut ki runar kiba la leit ban thombor ïa ki nongdie dukan ha ka thaiñ New Chekon, Imphal East district – 3 kynhun ki shipai Indian Army bad Assam Rifles ki la leit mar mar sha katei ka thaiñ ban leit kem ïa kitei ki runar.
Ha ka jingleit khynra jong ki bro shipai, ki la ïoh ban kem ïa baroh 3 ngut ki runar ba na ka met jong ki, ki la ïoh ruh ban kurup ïa 2 tylli ki suloi ‘single barrel 12 bore gun’. Ïa kitei ki 3 ngut la leit ban aiti noh sha ki bor pulit ka thaiñ Imphal East police khnang ban pynlong ïa ki jingtohkit kiba dang sah.
