Shillong, Jymmang 23:
Ka Rymbai Iawpynsing bad ka Mawlai SC ki la khur ïa ka jingjop ha ka lympung ïalehkai Meghalaya State League 2023 hadien ba ki la lah ban thep mar 5-1 kol ha ka sngi Ba-ar.
Ha kane ka jingïakhun jong ka Group-B kaba la long ha Kiang Nangbah Stadium kaba ha Jowai, u Hesmiki Rymbai u la khur ïa ka hat-trick hadien ba u la ïoh ban thep kol ha ka minit kaba 5, 82 & 84. Katba ïa kiwei pat ki kol la thep da u Obadaia Bareh (19′) bad u Niwan-o Bareh (72′) ha shwa ba u Païabanteiskhem Bhoi (90’+1) un pynphai kylla na na ka bynta ka Sein Pynbhalang hashwa ban kut ka jingïalehkai.
Lyngba kane ka jingjop, ka Rymbai ka la ïasoh lang bad ka Rangdajied United lem bad ka Ladthadlaboh ban kamai mar 9 dor-thong (point), hynrei ki dangsah ïa ki jingïakhun. Katba ka Sein Pynbhalang ka dang don shatrai, hynrei ka la lah ban pynphai shi kol ha kane ka jingïakhun.
Ha ka jingïakhun jong ka Group-A kaba ka long ha madan Third Ground, Polo ka Mawlai ka la pynjem khnap ïa ka Umkseh SC da 5-1 kol. Kumba long ka Rymbai, ka Mawlai ka la long ka kynhun kaba khlaiñ bor haduh kaba kut jong ka jingïalehkai.
U Robert Khongriah (19′) u la ïoh ban pynkhih jar nyngkong eh hadien ba ki para nongïalehkai, kita u Brolington Warlarpih (21′) bad u Donlad Diengdoh (39′) kin pynbud sa ar kol na ka bynta ban tam da 3-0 kol ha ka kylla step. U Remark Kharmalki u la ïoh ban thep ar kol ha ka minit kaba 55 & 79.
Hynrei ha shwa ban wai jong ka jingïalehkai ka la long ka khubor kaba pynsngewsih ïa ka Mawlai naba u rangapkol u Neithovilie Chalieu u la shah sei da ka red card na ka daw ka jingbakla bad u rangïalehkai ka Umkseh. Kumta u Donborlang Nongkynrih u la hap ban shim ïa ka bynta kum u rangapkol, hynrei um shym la lah pat ban kyrda ïa ka bol ba la shut da u Marcellino Khongsit (90’+5) ha ka penalty.
Kumta ka Mawlai kan duh ïa u Chalieu na ka bynta ka jingïakhun ka ban wan, hynrei kane ka kynhun ka la bat ïa ka kyrdan ba hakhlieh na ka Group-A da kaba kamai 9 dor-thong.
Ha kiwei pat ki jingïakhun, ka Chipakkore FC ka la khur ïa ka jingjop kaba nyngkong ha ka Group-D bad ka Seven United ka la khur ïa ka jingjop kaba ar ha ka Group-C.
Ka Chipakkore ka la lah ban khur ïa ka jingjop kaba nyngkong ha ka MSL hadien ba lah pynliem ïa ka Atong Matgrik FC da 5-2 kol ha ka Group-D kaba la long ha madan Chandmari kaba ha Tura. Katba ka Seven United ka la pynliem noh ïa ka Pyndengrei da 2-1 kol ha ka Group-C ha madan MDSA kaba ha Mawkyrwat.
Ha kane ka jingïalehkai u Arkidalang Myrthong (17′) bad u Teilang Kurbah (47′) ki la ïoh ban thep kol na ka bynta ka Seven United, katba u Wanpyrkhat Ïawphniaw (90’+2) u la lah ban pynphai kylla na ka bynta ka Pyndengrei hashwa ban kut artad ka jingïalehkai.
Ïa kitei ki san kol na ka Chipakkore la thep da u Balkan Marak (20′), Samuel Shadap (52′), Sidartha Rabha (63′) bad u Baiarjingmut Syngkli (77′, 82′) u la thep ar kol. Katba na ka Atong Matgrik la lah ban thep da u Senwal Ch Marak (4′) bad u Walsrang Ch Sangma (37′).
