Shillong, Jymmang 23:
Ka seng Hynñiewtrep Youths’ Council (HYC) lyngba ka jingwad RTI ka la lap ba ka sorkar jylla ha ki san snem kiba la dep ka la shu pynlut bad pynsepei kai ïa ka pisa jong u paidbah kaba la kot haduh T. 4 klur tam ha ki Chairman, Co-Chairman, Vice-Chairman, Deputy Chairman bad ki dkhot jong ka Meghalaya Economic Development Council (MEDC) bad ka Meghalaya Resource and Employment Generation Council (MREGC).
Haba kren sha ki lad pathai khubor ha ka Sngi Ba-Ar, u General Secretary ka HYC, u Bah Roy Kupar Synrem, u la ong ba ka jingpan RTI jong ka seng na ka tnad Planning ka long halor ka jingthung kam jong ka sorkar jylla ïa ki nongmihkhmat ha ki 5 snem kiba la dep naduh u snem 2018 haduh shwa ka ilekshon MLA 2023 ha kitei ar tylli ki Council – MEDC bad MREGC.
U Bah Roy u la ong ba ka seng National People’s Party (NPP) hapoh ka jingïalam jong u Myntri Rangbah ka jylla, u Conrad K Sangma mar ïa shimti kum ka sorkar ha u bnai Lber mynta u snem la ïohi ba ka la thung kumba 21 ngut ki MLA, ki MLA barim, ki nongtrei jong ki seng bapher bapher ba kin long kum ki Chairman, Co-Chairman, Vice-Chairman, Deputy Chairman, bad ki dkhot jong ki Board, Council, Committee, Commission bapher bapher.
U la ong ba ha ka 23 tarik Jymmang 2023, ka sorkar ka la thung sa kumba 6 ngut eiei kiba kynthup ïa ki arngut ki MLA barim bad 4 ngut kiba dei ki nongkitkam jong ki seng kiba don hapoh jong kane ka sorkar ban long kum ki Co-Chairman bad ki Vice Chairman ha kita ki Council, ki Committee bad ki Commission bapher bapher.
Lyngba ka jingwad RTI, ka seng ka la lap ba ka sorkar jylla ka la pynlehnohei ïa ka pisa da kaba siew tulop haduh T. 1,55,02,266 ïa ki dkhot hapoh ka Meghalaya Economic Development Council bad na ka Meghalaya Resource and Employment Generation Council la siew tulop kumba T. 2,87,18,941. Hynrei u la ong ba kaba lyngngoh ka long ba kitei ki Council kim ju pynlong satia ïa ki jingïalang ha ki 5 snem ba la leit naduh ba la thaw ïa ka sorkar Meghalaya Democratic Alliance-1.
U Bah Roy u la ong ba katkum ka jingong jong ka sorkar ka la ong ba ka kamram jong ka Meghalaya Economic Development Council ka dei ban ai jingmut sha ka sorkar ba kumno ban pynkiew ha kaba ïadei bad ki kam ban ïoh pisa lane ban pynkiew ïa ka ïoh ka kot jong ka jylla bad ban khmih kumno ban pynkiew ïa ki karkhana, hynrei ha kine ki 5 snem kiba la leit katei ka Council wat tang kawei ka jingïalang ruh ka khlem shym la shong satia ban ïakren halor ban pynkiew ïa ka jylla ha ka ïoh ka kot.
“Ïa ka pisa ngi la shu siew ei ïa ki bad la shu pynlut bad pynsyrwa kai ïa ka pisa jong u paidbah, hynrei wat tang kawei ka jingïalang lane iwei i jingai jingmut ruh katkum ka rukom treikam kaba la thung ïa ki bad ba la aiti ha ki ban leh, hynrei ki khlem leh tang iwei i bynta ruh hynrei na ka pla tyngka jong u paidbah la siew kai ïa ki,” la ong u Bah Roy.
U Bah Roy u la ong ba tang kitei ar tylli ki Council, la lap ba ki la pynsyrwa kai ïa ka pisa jong u paidbah haduh kumba T. 4,42,21,2017 ha ki san snem kiba la leit.
“Kaba sngewsih ban ong ka long ba kine ar tylli ki Council kiba hap hapoh ka tnad Planning ki la shu long pynban kita kiba shu kjit ïa ka pisa jong u paidbah bad pynstait ïa ka pla jong ka sorkar,” la ong u Bah Roy.
U Bah Roy u la ong ba ka jingthung jong ka sorkar ïa kine ki Council bad ki Commission ka long ba kin pyndep ïa ka kamram bad ba la siew ïa ki da ki phew tyngka ha ki san snem kiba la dep hynrei hato kitei ki Council ki la ai kano kano ka jingnoh synniang sha ka jylla ne hato ki la pynlut kai pynban ïa ka pisa jong u paidbah bad ka pisa ba la siew sha kitei ki Council kam dei satia jong u Conrad Sangma hynrei ka dei ka pisa jong u paidbah kaba long lyngba ka khajna bad ka kuna.
“Lada ïa ka pisa kaba ngi hap siew phi shu pynsyrwa kai sha kaba siew sha kita ki briew tang na ka bynta ba phin myntoi ma phi bad tang na ka jingïoh nong jong ka seng lajong ban pynhun ïa ki seng kiba don ba kin kyrshan ïa ka sorkar, ka long kaei kaei kaba ngim sngewtynnad bad ngim sngewïahap,” la ong u Bah Roy.
Na ka liang ka HYC ka la ong ruh ba ha ki sngi ban sa wan kan sa thoh da ka shithi sha u Myntri Rangbah ban dawa ba u dei ban peit bad leh eiei ban pyntikna ban ym pynsyrwa kai ïa ka pisa jong u paidbah.
