Shillong, Jymmang 23:
Da ki hajar ngut ki nongïakhih pyrshah ba la lamkhmat da ki nongïalympat kynthei, ki la ïalum lang ha ka nongbah Delhi ha ka Sngi Ba-ar na ka bynta ban dawa iehnoh kam bad ban kem mardor ïa u President jong ka wrestling federation.
U President jong katei ka synjuk u Brij Bhushan Sharan Singh u la shah kynnoh ban u la jrong kti bad leh tohmet ïa ki khynnah ïalehkai kynthei ba kynthup ïa kiba dangrit.
Ha ryngkat ka lama jong ka ri, kitei ki nongïakhih pyrshah ki la ïaid sha India Gate hajan ka ïingdorbar bah (parliament) bad la synran lang ïa ki da ki bor pulit.
Kine ki nongïakhih pyrshah ki la pynlong ki jingïakhih pyrshah la kumba shi bnai wat hapdeng ka jingshit kyrang jong ka suiñ bneng bad ki nongïalympat ki la sangeh ruh ïa ki jingkilan met. Lah ban kdew ki nongïalehkai kiba la khur ïa ka takma ha ka Olympic kita u Bajrang Punia bad ka Sakshi Malik, ki la ïasoh lang ban pynpaw ka jingpyrshah bad ki la byrngem ruh ban pynphai noh ïa ki takma lada ym lah ban pynshitom eiei ïa u Singh.
Ïa kane ka jingïakhih la ïoh jingkyrshan ruh na ki seng saiñ pyrthei kiba don ha ka liang pyrshah bad ka kynhun jong ki nongrep bad kiba bun ki briew ki la pynpaw halor ka jingshah leh tohmet ki khynnah kynthei ha utei u nongïalam ka synjuk ïalympat.
Kumba ka paw kiba bun na ki nongïalehkai ïalympat ki dei ki nongrep kiba na ki bynta shaphang shatei kita na Haryana bad Punjab.
U Singh, uba la 66 snem ka rta bad uba dei ruh u MP uba la mihkhmat na ka seng Bharatiya Janata Party, u la kyntait halor kane ka jingshah kynnoh bad u la kynnoh ba kane ka dei kaba la don bynta lang bad ka seng Congress.
Ka Vinesh Phogat, kaba long ka khlur nongïalympat kaba la khur ïa ki takma ha ki lympung ïalehkai shabar ri, ka la pynpaw dangshen shaphang ki coach kiba la leh tohmet ïa ki khynnah kynthei.
Ïa kane ka jingkynnoh jrong kti pyrshah ïa u Singh la nang tohkit da ki pulit jong ka ri bad u la shah khot hajir halor kane ka bynta.
Na ka liang ka Supreme Court jong ka ri ka la shim khia halor kane ka jingkynnoh, hynrei na ka liang ki nongïalam ka liang synshar kynthup ïa u Myntri Rangbahduh ka ri u Narendra Modi kim shym la pynpaw eiei halor kane ka bynta.
Dangshen mynta u snem ka tnat ïalehkai ka la kyntu ïa u Singh ba un hiar shuki noh khnang ban lah ha ka ban tohkit ia u. Hynrei u Singh u la ïai bteng ban ïalam ïa katei ka synjuk. Hau Iaiong, ki nongïalehkai kynthei ki la bteng ïa ka jingpyrshah khnang ban pynkut noh ïa ka jingleh donbor u Singh bad ba u dei ban shah kem noh.
