Shillong, Jymmang 23:
U rangapkol ka Argentina uba la ïadon bynta ban khur nam lahduh ha ka World Cup 2022, u Emiliano Martinez un wan ban plie ïa ka ‘Pele-Maradona-Sobers Gate’ jong ka Mohun Bagan ha ka jingwan ïuhkjat ka jong u ha kane ka klob ha ka 4 tarik u Naitung, la pynbna ha ka Sngi Ba-ar.
“Ïa u Martinez yn pynkup burom bad un leit jurip kylleng ki jingtei jong ka klob ka jong ngi bad un ïakynduh ruh ïa ki katto katne ki dkhot ki ban sa jied,” la ong kat kum ka kyrwoh na ka Mohun Bagan hadien ba ka la dep shong ïa ka executive committee.
Utei u rangïalehkai uba la khur ïa ka khusnam Golden Gloves ha ka FIFA World Cup 2022 un wan sha kane ka nongbah bad yn don ruh katto katne kiwei pat ki prokram. Ka Mohun Bagan ka la thaw ïa ki san ngut ki dkhot hapoh ka komiti bad u Debashish Dutta kum u general secretary un long uwei na ka bynta ban pynïaid beit ïa ki prokram.
Nalor kata, kane ka klob ka la rai ruh ban phah ïa ka shithi ai khublei sha u trai ka kynhun ïalehkai ISL u Sanjiv Goenka.
“Ïa ka shithi ai khublei yn phah sha u Sanjiv Goenka halor ka jinglah ban khur ïa ka nam lahduh ha ka ISL bad ban sngewthuh ïa ka mynsiem ïalehkai kane ka kynhun ban pynlong ïa ka kum ka ‘Mohun Bagan Super Giant’,” la bynrap.
Shuh shuh kane ka klob kan sa plie ruh ïa ka media centre ka ban sa ai kyrteng hadien u general secretary barim u Anjan Mitra.
